Apr 02 – Tordong ayam Kitungan a d’ong Senkenraba!

“Gamangtungan a d’ong hen kuddub ayam lingan sentai; Anin apsele t’od-ling-hen dile tordong sanensenan dakute” (Sanenken 34:1).

Bagu sanenkenranji daku: dirgale anabgugu do uailoge anabgugu Kitungan a d’ong abpemengte. Kitungan a d’ong abguguben do a senenben boi boi bangsa, angante amben handrangan a hangte Kitungan amang saring. Berna asan, amben bo bangsa baran ahangle, orde banangsa dele mandrengna-ling-ben. Kun ayam-lingan sattan asenben orde abguguben bo bangsa anabsittan ahangte.

Angante amben kanalkalan ahangte orde tanunjingan ayam-lingan amben Kitungan a d’ong abguguben dete, angante ahanten ayam-lingan, do kuddub ayam-lingan itdelejanan. Angante amben abgugute, Kitungan d’ongben bagu maneng asub kardiban tiytaben (Sanenken 149:8). Kitungan a bernanna kardiban, itente lanumudan aamben gonle arabtite do asangem-maranji janang idle arabtite. Kani nab o bangsa baran.

Bo arobjong-beran, Ayub amandrengna, buten Kitung-lingan adakule amandran. Aboi saring aboi anabkalkalan dele do anin barij arasuda-lingan dakule. Abo dina-lingan, abittin abs’idle do aboi saring aboi apasijanji abs’idle. Aboi soi pasijan admengad.

Aboanta a d’ong kanahidan dele. Kitungan a togi labsolinai ruangan saring do kuddub juntudleji. Asangem-maranji dunglenaiji do Kuddub janaban pangleji. A d’ong barij asangeleji. A dukkarin janang gamle: “amang okij mengtampo? Gamle Kitungan a d’ong angeten do kahidamte!”

Bindo kun kuddub kanalkal-linganji, Ayubon galam anabgugun aranaptin. Do anin gamle: “Bar anin gameten, Hen yang-hen a darakkuon lingan saring a putan yerai, do hen a putan dean dele tetten daiyarre yerte. Gamangtungan pangeten. Gamangtungan ahiman sanensenan de-ete” (Ayob 1:21). Aderna angaja ads’idad Kitung-lingan. Do atanakud-lingan iten dele? Anabgugun batte, as’idlingji ate bar hangle, bagu trading.

Nami kan ambrij mandrengnaben daku? amben er t’ul-lingan dakupo, baran er hanglabe, bittin do er baturna orde birindabenji gagana adhagejipo? J’e-ling-ben gabrij’enaba, ayob ambrij, abguguben asan, kuddub-lingan.

Tanahimdam Kitungan a onagji, iten amben abs’idle, dernaben abs’id-dong. Abguguben abmele tiydamnaba Kitungan a d’ong do dile tordong abguguba, kuddub ayam-ling. Kun batte anabsittan hangtabe.

Okiy Kinolbe absele: “Ayengan a mandra kanalkal tanungjengan sayete, anin  man’oihdam. Iten asan gamlenden tanungjeng lingan dainan hangan bangle anin ayengan a mandrengnan a raja-ranubboban Gamangtungan Anin a d’ong timyimten a mandranji a d’ong sibdaijeten, antate hangte” (Jakub 1:12).