ಜುಲೈ 01 – ಕರ್ತನ ಧ್ವನಿ!

“ನೀವು ಈ ಹೊತ್ತು ಆತನ ಶಬ್ಧಕ್ಕೆ ಕಿವಿಗೊಟ್ಟರೆ ಎಷ್ಟೋ ಒಳ್ಳೇದು. ನಿಮ್ಮ ಹಿರಿಯರು ಅರಣ್ಯದಲ್ಲಿರುವ ಮೆರೀಬದಲ್ಲಿ ಮಸ್ಸಾದಿನದಲ್ಲಿ ಮಾಡಿದಂತೆ ನೀವು ನಿಮ್ಮ ಹೃದಯವನ್ನು ಕಠಿಣಮಾಡಿಕೊಳ್ಳಬೇಡಿರಿ (ಕೀರ್ತನೆ 95:8).

ಕರ್ತನು ನಿಮ್ಮೊಂದಿಗೆ ಮಾತನಾಡಲು ಬಯಸುತ್ತಾನೆ. ಆತನು ನಿಮ್ಮನ್ನು ಚೈತನ್ಯಗೊಳಿಸಲು, ನಡೆಸಲು ಮತ್ತು ತನ್ನ ಮಾರ್ಗಗಳಲ್ಲಿ ಮುನ್ನಡೆಸಲು ಹಂಬಲಿಸುತ್ತಾನೆ. ಆದ್ದರಿಂದ, ಕರ್ತನ ಧ್ವನಿಗೆ ಗಮನ ಕೊಡುವವರಾಗಿಯೂ ಮತ್ತು ವಿಧೇಯರಾಗಿಯೂ ಇರಿ.

ಕೀರ್ತನೆಗಳು 29 ಕರ್ತನ ಧ್ವನಿಗಾಗಿಯೇ ಸಮರ್ಪಿತವಾದ ಒಂದು ವಿಶೇಷ ಅಧ್ಯಾಯವಾಗಿದೆ. ಅಲ್ಲಿ ನಾವು ಹೀಗೆ ಓದುತ್ತೇವೆ: “ಯೆಹೋವನ ಧ್ವನಿಯು ಎಷ್ಟೋ ಬಲವುಳ್ಳದ್ದು, ಎಷ್ಟೋ ಗಂಭೀರವಾದದ್ದು. ಯೆಹೋವನ ಗರ್ಜನೆಗೆ ದೇವದಾರುವೃಕ್ಷಗಳು ದಡಲ್‌ಎಂದು ಮುರಿದು ಬೀಳುತ್ತವೆ; ಯೆಹೋವನು ಲೆಬನೋನ್‌ಪರ್ವತದಲ್ಲಿನ ಮಹಾ ದೇವದಾರುಗಳನ್ನೂ ಮುರಿದುಬಿಡುತ್ತಾನೆ.” (ಕೀರ್ತನೆ 29:3–5).

ಕರ್ತನ ಧ್ವನಿಯನ್ನು ಕೇಳಲು ಸಿದ್ಧರಾಗಿರಿ. ಆದಾಮ ಮತ್ತು ಹವ್ವಳು ಹಗಲಿನ ತಂಗಾಳಿಯ ವೇಳೆಯಲ್ಲಿ ದೇವರ ಧ್ವನಿಯನ್ನು ಕೇಳಿದರು (ಆದಿ 3:8). ವಿಜ್ಞಾನಿಗಳ ಪ್ರಕಾರ, ದಿನದ ಅತ್ಯಂತ ತಂಪಾದ ಸಮಯವೆಂದರೆ ಮುಂಜಾನೆ ಮೂರು ಮತ್ತು ನಾಲ್ಕು ಗಂಟೆಯ ನಡುವಿನ ಅವಧಿಯಾಗಿದೆ. ಕರ್ತನೇ ಸ್ವತಃ ಹೀಗೆ ಹೇಳಿದ್ದಾನೆ: “ಆತುರದಿಂದ ಹುಡುಕುವವರು ನನ್ನನ್ನು ಕಂಡುಕೊಳ್ಳುವರು.” (ಜ್ಞಾನೋ 8:17).

ಪ್ರಪಂಚದ ಗದ್ದಲಗಳು ನಿಮ್ಮ ಕಿವಿ ಮತ್ತು ಮನಸ್ಸುಗಳನ್ನು ತುಂಬುವ ಮುನ್ನವೇ ಕರ್ತನ ಧ್ವನಿಯನ್ನು ಕೇಳಲು ಮುಂಜಾನೆಯೇ ಎದ್ದೇಳಿರಿ. ಆತನ ಹೃದಯವು ಸಂತೋಷಗೊಳ್ಳುವಂತೆ ಆತನನ್ನು ಸ್ತುತಿಸಿರಿ ಮತ್ತು ಆರಾಧಿಸಿರಿ.

ಪ್ರವಾದಿಯಾದ ಎಲೀಷನು ಜನರಿಗೆ ಕರ್ತನ ಸಂದೇಶವನ್ನು ತರುವ ಮುಂಚೆ ದೇವರ ಸನ್ನಿಧಿಗಾಗಿ ಹಂಬಲಿಸುತ್ತಿದ್ದನು. ಒಬ್ಬ ಗಾಯಕನು ವಾದ್ಯವನ್ನು ನುಡಿಸುತ್ತಿದ್ದಾಗ, ಕರ್ತನ ಕೃಪೆಯ ಹಸ್ತವು ಅವನ ಮೇಲೆ ಬಂತು, ಪ್ರವಾದನಾ ಅಭಿಷೇಕವು ಅವನ ಮೇಲೆ ನೆಲೆಸಿತು ಮತ್ತು ಆಗ ಅವನು ಪ್ರವಾದಿಸಿದನು ಎಂದು ಸತ್ಯವೇದವು ನಮಗೆ ತಿಳಿಸುತ್ತದೆ (2 ಅರಸು 3:15).

ನಾವು ಪವಿತ್ರ ಗ್ರಂಥದಲ್ಲಿ ಬಿಳಾಮನ ಬಗ್ಗೆಯೂ ಓದುತ್ತೇವೆ. ದೇವರ ಧ್ವನಿಯನ್ನು ಕೇಳಲು ಮತ್ತು ಆತನ ವಾಕ್ಯವನ್ನು ನುಡಿಯಲು ಆಶಿಸಿ, ಅವನು ಏಳು ಬಲಿಪೀಠಗಳನ್ನು ಕಟ್ಟಿ, ಕರ್ತನಿಗೆ ಯಜ್ಞಗಳನ್ನು ಅರ್ಪಿಸಿ, ಆತನ ಸ್ವರವನ್ನು ಕೇಳಲು ಕಾಯುತ್ತಿದ್ದನು (ಅರಣ್ಯ 23:1–2).

ಇಂದು, ಕರ್ತನು ಬಯಸುವ ಯಜ್ಞವು ಜಜ್ಜಲ್ಪಟ್ಟ ಆತ್ಮವಾಗಿದೆ. “ಮುರಿದ ಮನಸ್ಸೇ ದೇವರಿಗೆ ಇಷ್ಟಯಜ್ಞವಾಗಿದೆ.” (ಕೀರ್ತ 51:17). ಆತನನ್ನು ಪ್ರಸನ್ನಗೊಳಿಸುವ ಯಜ್ಞವು ಸ್ತುತಿಯಜ್ಞವೇ—ಅಂದರೆ ನಮ್ಮ ತುಟಿಗಳ ಫಲ. ನೀವು ಮುರಿದ ಮತ್ತು ಜಜ್ಜಿದ ಹೃದಯದಿಂದ ಕೃತಜ್ಞತೆಯನ್ನು ಅರ್ಪಿಸುವಾಗ, ದೇವರ ಸನ್ನಿಧಿಯು ನಿಮ್ಮನ್ನು ಆವರಿಸಿಕೊಳ್ಳುತ್ತದೆ. ಕರ್ತನ ಮೃದುವಾದ ಧ್ವನಿಯು ನಿಮ್ಮ ಆತ್ಮದಲ್ಲಿ ಪ್ರತಿಧ್ವನಿಸುತ್ತದೆ. — ನಿಮ್ಮ ಸುತ್ತಲೂ ಸಾವಿರಾರು ಧ್ವನಿಗಳು ಗದ್ದಲ ಮಾಡುತ್ತಿರುವಾಗಲೂ, ಕರ್ತನು ನಿಮ್ಮ ಆತ್ಮವನ್ನು ಎಚ್ಚರಿಸುತ್ತಾನೆ; ಇದರಿಂದ ನೀವು ಅದನ್ನು ಗುರುತಿಸಿ, “ಇದು ನನ್ನ ಪ್ರಿಯನ ಧ್ವನಿ!” ಎಂದು ಹೇಳಲು ಸಾಧ್ಯವಾಗುತ್ತದೆ.

ಪ್ರಿಯ ದೇವರ ಮಕ್ಕಳೇ, ದೇವಕುಮಾರನು ನಿಮ್ಮೊಂದಿಗೆ ಸಂಭಾಷಿಸಲು ಮತ್ತು ನಿಮ್ಮ ಸಹವಾಸದಲ್ಲಿ ಆನಂದಿಸಲು ಇಳಿದು ಬರುತ್ತಾನೆ. ಪವಿತ್ರಾತ್ಮನು ತನ್ನ ಶಾಂತವಾದ, ಮೃದುವಾದ ಧ್ವನಿಯಲ್ಲಿ ನಿಮ್ಮೊಂದಿಗೆ ಮಾತನಾಡಲು ಬಯಸುತ್ತಾನೆ. ಆ ಪ್ರೀತಿಯ ಧ್ವನಿಗೆ ನಿಮ್ಮ ಹೃದಯವನ್ನು ಯಾವಾಗಲೂ ತೆರೆದಿಡಿರಿ.

ಮುಂದಿನ ಅಧ್ಯಾಯನಕ್ಕಾಗಿ ದೇವರ ವಾಕ್ಯ: “ನಾನು ನಿದ್ರೆಗೊಂಡಿದ್ದರೂ ನನ್ನ ಹೃದಯವು ಎಚ್ಚರಗೊಂಡಿತ್ತು; ಇಗೋ, ಎನ್ನಿನಿಯನು ಕದ ತಟ್ಟಿ ಪ್ರಿಯಳೇ, ಕಾಂತಳೇ ನಿರ್ಮಲೆಯೇ, ಬಾಗಿಲು ತೆಗೆ!” (ಪರಮ ಗೀತ 5:2).