Apr 08 – Sanenkendran!

“Bar tungar-togal ambrij Pol do Sila Kitungan amang garberre senkenleji, do kunate koijo maranji amdangleji” (Anappai 16:25).

Anappai Pol do Sila Pilipi gardaba yirle bangsa hanang tiyleji. Bo inslo-onan ermarid janggardan batte hamle adakule ate amdungleji. Bindo angante anin agamangan gijle ahangdrangan abmele, aninji tolbadleji Pol Sila a d’ong bajara-lingan.

Bibolan gamte: “Bar onla maranji aninji asanggen lingan anrukku delenji do darugga maranji aninji a sindrin r’zdle pele ruijleji, do danggun batte a tzdben baihleji. Do aninji ateng tzdbenji a tiki karoijosing lingan pidan piddle, aninji a d’ong bangsale turtura, gamle karoijosing turtur maran a d’ong baihleji” (Anappai 16:22-23). Aninji a d’ong asoso korojosing-lingan pidleji do ajinganji tanolbadan dele. Kun ayam-lingan, do tungar togal-lingan, Pol do Sila garberlen do kenkena kenleji Kitungan a d’ong abgugule, do korojongsing maran amdangleji.

Bo bigarda korjongsing maraanji ja, ayengan amandranji satid samoi anabkalkallingan adakunji, adkenadji do adsenedji. Bo maneng, Pol do Sila, ayengan amandranji ateng anabkalkalan batte adakulenji, er dusan batte adakuleji, aninji kenle sinkendrale garberlenji. Nami janang, bagu mandranji ambrij dakuji kan ordar-lingan: bo ompu ate, Janggardan ataniytiyan hangleji do rumang baran janang lumteji Kitungan ahimlen. Do bo bigardan a ompu ate, hangdrangan hangle asusunan saring.

Angante karojong sinlingan, Pol do Sila edjaja adgamadji do adukadamnadji. Aninji Kitungan a d’ong adgaradji: “Iten ambrij abaran alumlai gamle? Anlen bara-Nam lumle daku ahim-ling-Nam. Yangam kan ambrij anlen ahanglai?” Aninji Janggarda-lingan m’oih-linji. Aninji derlenji kuddub baran Kitungan atanimyiman batte dete, do kanalkalan ayam-ling janang Kitungan a d’ong senkendraleji.

Angante Pol do Sila abguguleji, aboi sattang asanangted bindo kuddub sanangan rilen do a ntanol-badanji adurle. Bo surda yurlo yirrai, barij gaijitalan yurneten. Kun ate aboi a janrdinna Kitungdage ayurlo, buteja adkahidadji, buteja anaduradji. Kun ayurlo batte, karojongsing maranji analu hangle. Do atanakud-lingan, bangsale baran dele.

Tanahimdam Kitungan a onagji, angante amben kanalkal-lingan dakutaben, do j’e-ling-ben asudataben, iten alumben dete adgalame, kenle Kitungan a d’ong abguguba. Anabgugun asenkendran, kun batte bo bangsa anabsittan do rumanganji agijte.

Okiy Kinolbe absele: “Dile tordong m’oihnaba. Er kaddablabe garbernaba. Kuddub janaban apsele sanensenan tiyba, iten asan gamlenden Kristu Jisu lingan amben apsele kanate Kitungan a itsuman” (1 Tessalonikia 5:16-18).