Apr 06 – Sanenkendran a Baran!

“Bar anin Daudon do rajan a roitadgij mar Gad do tungmadgij mar Natan tam banaihan ambrij tanarjabanji, sanarding-raijanji do bina-raijanji a hamlenji a buyanji a d’ong GAMANGtungan a s’ing lingan tabngijeten. Iten asan gamlenden a tungmadgij maranji batte antate GAMANGtungan baiheten” (2 Birinda 29:25).

Sanenken-lingan gadlamlangten Kitungan aa d’ong a senben kan ordar-lingan. Do anabpungge kambol-lingan, er kabdab-ling-ben asanensenan adete ate, Kitungan a mandranji ampara. Angante Amben ordardage a d’ongan batte abgugut Kitungan a d’ong, kan ate boi boi bangsa anabgugun dile ayaman alumtabe.

Raja Daudo rumangdale Kitungan a pissirdianji, kirobin, serobin do anabgugun batte anablun ahangte Kitungan amang saring. Ruangan lingan ambrij asenkendran Kitungan ordaran saring agijben itsumte. Ompu-batte asenkendranji saiten Kitungan.

Aamben agalamtepo jajing mandranji dakuleji abguguben asan? “Unji ajar turtursang marji dakueteji, do itente danebdeb janabanji hen sabjalai, kuni batte unji ajar mandra GAMANGtungan a d’ong a senkendraben asan dakueteji” (1 Birinda 23:5). Ogandile gijba, unji ajar mandranji batte asenkendran darabdinganji batte do Kitungan a d’ong abguguben. Kan aboi bo sanna ruangan ordar-lingan!

Daudo idolle sanenkenan Kitungan a d’ong abguguben abmele. Anin a baradaman ambrij do bibolan kinolle. Anin janang ogandile yangam asenben bo ompun batte do kuddub handramanji batte. Anlen bibol-lingan gijtabe hanamdranganji: “Anin abmele bo tabme kanenkenan kenba; man’oihan a uai-sarrangan batte bangsale raijba” (Saanenken 33:3).

Hen dangarda adakulih adnang, anlen kenkenan kele adakulenai, palu kaban itente agamte, ranan aranubaban, sanenkendranji ajanaban, s’ing-lingan, daina kaban do man’oihan barij delelen ruangan-lingan ambrij. Tangboi tangboi janaban dakute ruangan lingan. kan ordar-lingan, ataarjubtaben do araitaben ate daku. itedelejanang angante anlen raitaben ayam-linga jaru-j’en batte alumben dete, eteden ruangan-lingan man’oihan dakute. Do Kitungan anabgugundete.

Daudo a d’ong gijba. Anin senle a s’inglingaan saring. Anin gamle: “Baritunasing-ling-hen anosai-Namji kanenken-henji deteji” (Sanenken 119:54). Tagor-lingan janang anin senle. Angante Kitungan abungsan Jerusalemban ganle, anin tongsenglen do erdkalen, do anin adnogandiad tagor-lingan anin daku (2 Samuel 6:14). Anin senkendrale Kitungan atimangba. “Etteden hen surda ranukku lingan d’ong-Nam sentam; ateng onla maranji amang lingan hen d’ong-Nam senkendratam” (Sanenken 35:18). Tanahimdam Kitungan a onagji, amben janang Kitungan a d’ong senle apemengba, Daudo ambrij.

Okiy Kinolbe absele: “E GAMANGtung, sanurdan, ranaptin, ganugun, dainan, do panemengan Amanate. Iten asan gamlenden ruang lingan do ordar lingan itente itente daku, kun a kudduban Amanate. E GAMANGtung, rajaman Amanate bar Aman kudduban a lanangka b’oban ambrij gugudam” (1 Birinda 29:11).