Mar 10 – Anin Timyimeten!

“Jisun ordar lingan a mandradamanji a d’ong timyiman timyimle, a tanakudan sikoi ja aninji a d’ong timyimeten” (Jon 13:1).

Kitunglen barij tanimyim daku, asuyeman do sanayaman, do a tanakudan sikoija timyimlangten.

Tulab-lingan tagoran do bo inslo-aliban argalan do d’an agaben saite. Atanakud-lingan aninji tagoran hangleji, asui adakun amanengba. Kun inslon aliban omdile agadanaben asan. Kun ambrij, aninji omdileji, kun inslon aliban a d’ong agadanaben abmele.

Angante aninji ganludleji atanakudlingan buteja adgaeji bo mandra adgaen sikoija, aninji at’odanji batte gadatenji. Bindo d’an adnahidan, aninji gadalenji janang. Aninji badtongleji agadanaben asan, anten asan aninji argaldaleji. Yang a tanimyiman kan ate! kani na ate janardi tanimyiman, tiydamna tanimyiman.

Bo dinna simil-singkui traingodba halen yirleji, abumung a inslon ajing kun traingod-lingan palule do kuni-lingan saring dunglen adrabtiad. Do atanongba amdungle adrabtiad, anin ajingan atab-ben apsele susule bindo table adraptiad.

Danukkan batte, aninji adakuleji adnang bo trainan kun atagor-lingan yiraiten. Kun inslon ajing paludle, atanongban a d’ong gamle amang sagai yira mandrengnanam lu’uete. Bindo anin a d’ong aluben asan errele guile, anin gamle a d’ongan hen amang ampara dakutinai karahidan sikoija, bagunle akahidben dete.

Tanimyimdam Jisu Kristulen, itejanang adbantongan karahidan janang arakadang-lingan. Anin a d’ongan sanumaranji orde karahidan edjaja adnamead. Anin arakadangban saring janang abridlen adhirad.

Iten asan gamlenden Anin d’onglen atimyimlen asan, a d’ongdam-lingan Anindaman tiydamlen do arakadang-lingan karahidan, anlen abmele. Bibolan gamte: “bar ordar rajanji a Danegod Mar, karahid maranji adebasijan, anta dernadage Sakki Mar Jisu Kristun amang saring asuyeman do sanabyun debente. Butente timyimlalen, do pintu-lenji saring a mihaman batte aburnalalen” (Anabpungge 1:5-6).

Tanahimdam Kitungan a onagji, Anin a surda tanimyiman batte, Kitungan anlen abmele tiydamlen, amihaman batte kuddub pitunlenji gijdaeten, do d’onglen raja buya-mar abmeaiten. A tanimyim-lingan tannodan agasa.

Okiy Kinolbe absele: “Yante gamle buteja mandran agardi maranji apsele a pwrarda-daman umdrengte, kun saring buteja a tanimyiman surda ted” (Jon 15:13).