Mar 02 – Anin Tiylangten!

“Gamang Kitungan na uyungan do uddardan daku; Anin asuyeman do ganugu batte absittatalen” (Sanenken 84:11).

Kitungan amang asuyeman daku do Anin mangbaben asuyeman ranapti tiytaben. Kun asuyeman batte d’ongben dongrable do Kitungan a ganuguban urungtaben. Kun asuyeman d’ongben dongrabte uddardan ambrij kuddub er maridan saring.

Hen ateng ayam tiyj’etinai ‘asuyem-lingan’. ateng bernanji daku, hen gijlai do bo surda badlohim-maran ababling janaban dakule. Hen ogandilai do asuyeman alananka-lingan daku do kun ate surdate do surdate engale amben Kitungan a d’ong abgugute awr saring awrdam. Hen janang oganditai angante Kitungan asuyeman dunglen yirte, anablu sosote kun amandran amang saring, butenden asangem-maranji a d’ong saring rabte. Anten asan, hen raduloge dirtinai Kitungan a suyem-ling abasutaben boi boi bangsadam do Kitungan a suyeman batte anablun hangtabe.

Bindo angante hen kinollai do tiyj’elenai Kitungan a bernalen, hen galamlai do asuyeman Kitungan ataniytiyan, tanimyiman batte, asurda ganugu do panemengan batte. Amangan saring, asuyeman tiyaiten.

Banudiben do ranaptiben batte asuyeman adhange. Kan ate Kitungan amang saring ataniytiyan, Marid Janggardan ataniytiyan. Orde ambendaman erahidan amandrengna ahangtepo. Kan ate Kitungan ataniytiyan Kalobori atanimyiman saring.

Kan ate asuyeman batte sattang amben tanangle araptite do ganalamben batte ted. Kan ate ajardin-na asuyeman batte anablun hanglaben mandrengna ordar-lingan.

Anappai Pol lagad-damlen anindaman do gamle: “Bindo itente hen daku, antate Kitungan asuyeman batte hen daku. Do Anin a itente asuyeman hen apsele dele, antate kayatingge addead, bindo kuddubanji saring hen awr baran lumlai. Dele janang hendam ted, bindo hen ampara a dakutenan a Kitungan asuyeman maih baraten” (1 Korintia 15:10)

Tanahimdam Kitungan a onagji, ganalam-ling-ben a kinsadongne. Kulamling-ben janang akinsadongne, birinda-ben batte orde kinol-ling-ben. Lagad-damnaba do Kitungan asuyeman batte rubrubdamnaba. Eteden Kitungan d’ong-ben asuyeman batte daina tiytaben.

Okiy Kinolbe absele: “Gamangtungan saring itente a kuddub banangsan hen hanglai, kuni apsele hen Anin a d’ong iten rapti abyardultiyai? Hen anablu pinsamanan hamtai do Gamangtungan ahim lingan garbertenai” (Sanenken 116:12-13).