Mar 17 – Anin apsuigodtai!

“Uan a tangoran aman a yerben dete, antate Hen hanghangtam; mad-Hen batte d’ong-nam apsuigodtai” (Sanenken 32:8).

Yan a bangsa kan Kitungan ajanibjib beran do yan asuyem beran pwrardalen abmele!! Barij tanimyiman batte Anin d’onglen gamte Anin hanghanglangten iten atangor-lingan hanaben dete.

Jisaiya Kitung-lingan m’oihneten do tumadgij-berge ganudingan dele moiloi ahiman batte. “Anin Rubmangdam, Taniyber Mar, Ranapti Kitungan, Tarda Ayam U’an, Sanabyun a Raja, gamle ahiman panemengan dete” (Jisaiya 9:6). Anin abaiberan buteja ambrij anobjongan adea iten asan gamlenden Anin mandran ambrij akinoltenanted. Itedenja, kuni-lingan banudin yirtai do sanusun do tanakudan adakue. “E Gamangtung, Aman Kitung-hen; hen d’ong-Nam abgugutai, do ahim-Nam lemsentai. Iten asan gamlenden Aman rubmangdaman a baran lumle bar purban anogal-Namji dernadage do sakkaidage dakule” (Jisaiya 25:1).

Sanun ayam-ling, sanumaranji bo surda rukunan rukutenji sanun abmele ahangnaben. Angante desan kanalkal-lingan dakuteji, surda montrinji rukkutenji kun kanalkalan abmele arberben asan. Bindo amben Kitungan atimangba agob-ben dete, dile tagadaban, bibolan kinolle Kitungan anabhanghang hangba. Sanenkenan gamte: “E Kitung, hen apsele anogandi-Namji yan a janattidage! Kuni er danisandage daku!” (Sanenken 139:17).

Yangam Kitungan anabhanghang ahangte? Ambendaman lagad-damling Kitungan anabhanghang ahangben dete garberan batte. Kitungan abernan batte amben ahangte. Anin hanghangtaben ganumten saring do tanalmadan saring.

Bo ayam bo inslobojan abs’itle lebun janolda batte, a bara maran batte kun ate dele ateng labon ahilenji asan. Anin janang itjaja adhangad. Anin kun alebun bar-janang adhangad, ateng ayam anin kan ambrij. Atanakudlingan angante kun inslobojan Kitungan amangban garberlen, arasuda j’en batte, Kitungan a d’ong ualle iten asan amang lebun atiylen abmang banaiber-mar-nam adsajad? Itedeleja, Anin gamle Anin a d’ongan lebun ahangben atagoran. Banidsaramaran rabangle do ualle oblingle a d’ongan. Nami, angante kun inslobojan banidsaran a d’ong oblingle, Kitungan abernan ambrij, anin policeji a d’ongba urungle kun alebun barhangben asan. Tanahimdam Kitungan a onagji, Kitungan mukkababen dakuba, kuddubgod-ling-ben do Anin janardigodban urungtaben.

Okiy Kinolbe absele: “Gamangtungan a taniyberan tarda ayam tanangte; Anin a uggar anogalanji kuddub arsangkudanji sikkoija dakute” (Sanenken 33:11).