Mar 12 – Mar 11 – Anin Yertai!

“Anten asan Kitungan a ranaptidam a s’in a dane lingan amben lagaddamle dakunaba, yante gamle tungna ayam lingan Anin rapti abgugutaben” (1 Pitor 5:6).

Angante amben a lagaddamten do Kitungan a ranaptidam a s’in a dane lingan amben adakuten, Anin abgugutaben. Ajardinna ayaman yirtai d’ongben abgugule do abpemengtaben. Binto Anin a itsuman a ranapti s’in lingan adkunaben dete. hadab ayaman sikoija Kitungan dakutaben, amben banangsa ahangte aman’oihan batte do er dukkadage.

Joseph abmele ogandile gijba, a mandrengna lingan kuddub sanayin batte omdile kanurkuran ayamling do korojos’in-lingan bar Potiphar a s’in-ling. Anlen kinoltabe hanangber: “Kudduban apsele bo ayaman daku, do riangan a jaita kuddub tanangadan apsele Kitungan bo ayaman sedate” (Hanangber 3:1). U u, ajardinna hadab ayaman abmele Kitungan sedale kan kudduban abmele. Kitunglen Jisun itente Uan batte andanaku ayaman omdile, rumang baran alumben abmele. Anten asan, Kitungan a ranaptidam a s’in a dane lingan amben lagaddamnaba, hadab ayam-lingan Anin abdainabenten.

Bo ontidan abmele bo berna daku itente anin adarakuna abmele s’ingan gabdilte kan ambrij. Adre-lingan saring adungtenaihji atiki, amaihngan ahengben itsumte, arengengaji erang raduedam. Aninji engledam adraptieji, aninji sendalingan paludleji. Bogad aninji adarakuna-linganji bagu dinna ambrij dakulenjiden, aninji pedde hadab ranaptin hangteji badih gugudage ruanganban a engben abmele. Anlen omdile adakunaben dete kan abernan batte ganludlangten Kitungan hadab ayaman adtiylangne sikoija.

Bokurdi-mihgal boi do tungar miynum lingan kan ordar-lingan Kitungan a onan ambrij dakule, Kitungle Jisun bokurdi galji miynum sikoija buteja adgalamad. Yang er dusadage kan bokurdi-galji miynum sikoija dakule, Kitungan a baraling do ompu-lingan, kan bokurdi-mihgal-boi miynum sikoija ordarlingan! Bindo Anin omdile dakuneten Uan Kitungan ayaman adurtaih sikoija. Anten asan abaran yagi do tungar miynum dakule namitan sikoija anlen gijtabe do abaran lumle daku.

Jisun agaja banayage ladlumad, itendenja. Anin lumle kuddub hadab ayam-lingan, barijloge do bangsale. Angante drakyadan adhidle kun ayam janang rubmang baran lumle kananlingan, Jisun Uan Kitungan a hadab ayaman omdile. Hanangna maranji a nogandi dakule do Anin abmele dile darakunaban ganalaman deate gamle. Aninji gamleji: “Jisun aninji a d’ong gameten, Ardual-Hen endrang yerai, bindo ardual ben tordong daku…” (Jon 7:6). Tanahimdam Kitungan a onagji, Anten asan Kitungan a ranaptidam a s’in a dane lingan amben lagaddamle dakunaba, yante gamle tungna ayam lingan Anin rapti abgugutaben.

Okiy Kinolbe absele: “Ettegoi na e danggardanji, amben abmanggod maranji a dane lingan dakunaba, do di dargam-ben apsele lanagadan batte sindrige rotudamnaba, iten asan gamlenden Kitungan lzngna maranji a d’ong dangdangte, bindo lagad maranji a d’ong Anin asuyeman tiytiylangten” (1 Pitor 5:5).