Mar 07 – Anin Apsuigod Mar-ben!

“Engale yangan a onan a d’ong babyete, ettele Hen d’ong-ben babyetai; bar amben Jirusalem lingan banabyen a hangte” (Jisaiya 66:13).

Yan a banangsa kan ate yangan ambrij a banabye Kitungan amang saring! Angante u’anan a onan anabhana abmele dardite, a d’ong anin babyete. Yangan s’ing birindan anin gijgijte do babyele tagorte.

Ateng birindanji daku a uanji gahillen s’ingba adayertaeh ate aitai taden a pasijanji a d’ong. Ateng birindanji a ua maran bara-lingan dakute, royongan adtieji birindanji do pasijanji abmele. Do enegoi birindanji daku, rurdin batte, er sanbyun adakuten asan pasijanji aninjidaman aitsumanji ambrij abhanadamtenji. Kanalkalanji asan, kan ate yangan mai sattan babyelangten. Angante kanalkal-lingan dakulangten, Kitungan yangan a d’ong sedale hadab beran ambrij. Anin gamle Anin babyetaben yangan ambrij.

Kitungan sagalangten u’an ambrij engale sagalte, do asuyemte amang-lingan, engale u’an. Hadab ayma-lingan, yangan ambrij barijloge Anin timyimlangten. Anin Abram amangban gamdamlen El Shaddai. Ebri langan batte El Shaddai gamlenden yangan ambrij ababyete do hadab ayam-lingan a pasijanji a d’ong babyete, butente yangan ambrij do butente timyimte do abtagorte yangan ambrij.

Engoi pasijanji a u’anji batte dakuteji, asui aym sattang. Bogad-den au’a maran sagai baraten do bo mihnum-lingan bagu tagor orde bo tagor yirtai do iytai maine a pasijanji batte anten asan pasijanji omdile gijgijle dakutenji kun ayaman. Ateng ayam ayanganji ampara dakutenji pasijanji. Enten ayam, anlen gijtabe yangan u’an abara janang lumte.

Ateng ayam pasijanji marangteji, a kinolanji atakudte ayam-lingan, bara-lingan do apasidtenji ayam-lingan, asuleji janang ayanganji ampara dakuteji. Aninji banabyen do sanabyun saiteji, itente bangsa man’oihan pangtaiji. Ajardin-na, buteja objongle adrabtebe yangan a tanimyiman. Yangan agaja akaridae a pasijan do atanimyiman kinina ate erbandage dakute.

Kitungan ualete: “Yangan a memena onan a d’ong rapti karedate po? Anin a kudlen a passijan a d’ong adnasuyemdae po? U u, anin rapti karedate, dele janang Hen d’ong-nam akkareda-ai” (Jisaiya 49:15). Tanahimdam Kitungan a onagji, Kitungan d’onglen akkardae. Amben akaredadong a d’ongan, butente d’ongben akkaredae.

Okiy Kinolbe absele: “Kitung-ben gamte: Amben babyeba, amben mandra-Henji a d’ong babyeba. Amben Jirusalem a d’ong babyele opungba do, Anin a sanun tanakudan dele, anin a pintun tanabmadan dele; do anindaman a kuddub pintun asan Gamangtungan a s’in saring anin bagu terdeng panadradan hangle” (Jisaiya 40:1-2).