Mar 04 – Anin Gongle Amdungte!

“etteden Gamangtungan mukkaba-ben saring kan kuddub jattinji a d’ong gongle amdungte bar amben amben saring surda do radu jatti maranji a d’ong amdungle a szdte” (Bagujuanaber 11:23).

Kitungan bitsaramar d’ongben amdungben abmele. Anlen apsele Anin sanutin. Anin janang gonle amdungte ayengan amandranji asangemlangtenji. Do kan kuddubanji saring abdainataben, Anin adratitaben do radu abmetaben bigarda desanji orde bigarda ompungji itente asangem-ling-nam dakute.

Admang Israel maranji Kanan-lingan dane-leji, kan ate aboi ateng birindanji abasulenji a desan, a rajanji do asanumaranji. Do bogad israelanji kun desa daneleji itente adurban do adangan adungte, aninji bigardan rajanji saring dainan hangleji do gonle amdungleji.

Bibolan gadlamlangten do kan adarakuna abmele. Bagujuanaber-lingan, 7 a surda, anlen kinoltabe: “Ayengan a desan a daneben asan amben a yerte, kun a desa lingan angante Gamang Kitung-ben d’ong-ben abardutaben, seletten Anin amben saring gulji awr surda do radu jattinji, manan, ittinji, Girgasinji, Emoranji, Kananiyanji, Prijinji, Iddinji do Jebusanji a d’ong temang-ben saring gongle amdungte. Bar angante Gamang Kitung-ben aninji a d’ong s’i-ling-ben surpidte bar amben aninji a d’ong takkud abs’zdben dete. Aninji a d’ong asuyemdong” (Bagujuanaber 7:1-2). Kan gulji ompungji abmele Janggarda-dage agaramgaman daku. Kitungan gongle amdungte. Kun sattangted.  Anin janang aranadu tiytaben arduben abmele.

D’ongan murdadage Kitungan asangem-maranji abmele. Kan kuddubanji batte d’ongan radu abmete, do aninji janggardadage amandrengna batte sanutenji. Ateng mandranji daina adhangadji Kitungan ajanibjib ber-lingan, iten asan gamlenden d’ongdage lingan aninji dainan adhangedji.

Amben janang daina er hanglaben adakuten pedde. Uggarling-ben, kunina ate Kitunglen dainan atiyben asan oskaidam daku. Kitungan asuyeman batte dainan tiytaben kan ordar-lingan, tanunjingan do ganalu bar sonuman saring. Kitungan amang dakunaba etteden daina ahangte, dirna mad-ben batte agijte, kuddub asangem-marbenji a d’ong amdungle szdte.

Bar okij, itente anlen kinollabe kan apsele dinna-lingan. Israel-maranji a d’ong anappain adelenji adnang gameten: “Bar janang anlen kznggam maranji a gijlai. Anlen aninji saring bo sanna papparan ambrij apardi-damlenai, do ette jongjong anlen aninji a ganijgij lingan dele” (Danisam 13:33). Kan asangem-maranji radudam do ranaptidam dakuleji, Israelanji saring kan kudduban gongle amdungle szdeten. Tanahimdam Kitungan a onagji, mandrengna ling-ben janang Kitungan surda baran lumte.

Okiy Kinolbe absele: “Uante Uante a desa lingan amben a hadubte kun a kuddub lingan Gamang Kitung-ben Anin a tam jzbjzbnan ambrij, amben apsele mandranji a d’ong banantongan do tanakaran abmete; bar asanggem-ling-ben bo mandra janang rapti attanange” (Bagujuanaber 11:25).