Mar 01 – Anin Galamte!

“Bindo hen ayengan a tangor lingan hatenai, antate Anin galamte” (Ayob 23:10).

Ayob abmele buteja adgalame. A dukkarin angle do karidale omdrengte. Do agardinji iylai arberele babyelaji sanabyu-beran batte. Kan ambrij ayamlingan, anin gamle: “Bindo hen ayengan a tangor lingan hatenai, antate Anin galamte; bar Anin d’ong-hen a tungjengten a tiki hen kilai ranan ambrij dunglen yertai”. Ajardina Kitungan galamte tanunjing tagoran do kanalkalan.

Kitungan Mojes a d’ong gameten: “Hen Misor desa lingan mandradam-Henji a kanalkalan gijlai; obakam maranji a panadradan asan aninji a edanan amdanglai, bar aninji a satid samoihan galamtai” (Hanagod 3:7). U u, Kitungan kuddub mandrengna beran galamte itente lumtabe. Boanta singan saring israelanji a d’ong tandile, Anin d’ongben janang tandite kuddub kanalkalanji saring.

Daudo gamete: “Hen danukkan batte kujadungtih; hen tamparub edalen endungtai” (Sanenken 38:6). Bindo Kitungan itente mandran abmele kuddub agalamte ate Daudo gamte, gragana tebulan gabdilba Kitungan atimangling asangem-maranji abmele, do Marid Janggardan batte janababan deba.

George Washington, ayengan amandran gabdile United State of America, bo sanna sanulingan ayam hanaman dele, asangem-maranji a d’ong ahamben yiraiji do bo bigarda desaba yire-sidle a mandrengna arabarab-ben asan. Gardi-kuran batte asangem-maranji saileji. Do tampagal anin abrijneten, asonaben asan. Amandrengna lingan anin abrijneten, anin ardule maneng jordaban.

Kun ayam ragahingan dakule, kun jorda boroppon batte dakule. Kun maneng jordaban turdumle do garberneten: ‘Kitung, aman d’ong-hen galamte do aman asangem-mar-henji abmele galamte agontihenji ate. Nami hen sidamtinai jorda-lingan do mandrengna-hen sagalih’. Do erab ding-ding-ling-ben, anin jorda-lingan sidamlen do kuddub aranaptin batte engdana susule, do atigoi garberan batte a uggar-lingan. anin Kitungan aranaptin barij adakule asan, sayud’an a d’ongan hamle adraptiad. Miytai padle a tiki adrijneten. Asangem-maranji ardulaji jordaban bindo aninji kun sayud’a-lingan engdalen adrabtiadji, do kuddub aranaptinji batte janang aninji hamle adraptiadji.

Tanahimdam Kitungan a onagji, Kitungan galamte do Gerge Washington a kanalkal ayam-ling, do Anin galamte kuddub kanalkalben. Do kuddub kanalkal-lingan, Anin dainan tiytaben.

Okiy Kinolbe absele: “Dele janang bogad buteja Kitungan a d’ong timyimlenden anin Kitungan batte ganalaman dete” (1 Korintia 8:3).