Feb 25 – Sanarwm-Langamge!

“Iten asan gamlenden bute bute ranabraban hangteji, do bute bute s’zdteji, aninji amang lingan Kitungan a ganijgij lingan anlen Kristun abo sanarwm-langamge daku” (2 Korintian 2:15).

Anlen Ordaran a basudan. Anlen ordaran atanaran, bo anabta’aran do gardan abaru ambrij. Anlen janang Sarwm-Langedaman Kristun abmele, barij ordar-lingan.

Iten agaramgam Kristu Sarwm-Lanagedam? Itente amben mandrengnaben Kitungan abmele amengte. Bogad mandrengnaben marid dakulenden, danunsa orde pintun rdakulabe, kan ate boi boi bangsa mangdrena abmele a sakki, Kristu-lingan. do kan anablun tiyte, do Kitungan Jisun amang-ling urungtai.

Kan sarwm-lanange abmele idjaja agamben sanaisaited. Kan abmele Hen tettne daku agamte a berna. Angante bo sanarwmam tiyte, kuni-lingan ateng mandranji tabruiteji.

Ajar ajar adanganji tarban batte tanabrujan dete, sagai saring janang. Mandrengnaben janang, sanarwman ambrij, ateng mandranji yirtaji Kitungan a tanimyiman amaimaiben, amben anoblingle janang.

Nami danukka beran kan ate Kristumaranji amandrengna anabhana, sarwm lanange atiyteji apanardu. Janolda-lingan barij, er tarungna-lingan, tanabrui-lingan janardin saring, er marid baranji, gailan do jundran. Anten asan, aninji amandrengna-linganji daina adhageji, do Kitungan ahiman gabroiteji buten buten dirna-lingan yirtaiji adnang.

Kani kuni gamteji yangam Kristu-maran kan ambrij lumte? Do kanina aninji Kristun anabhana abldungteji yangam ahanaben dete. angante amben ordaran agijgijte bo madan batte, ogandile gijba ordaran d’ongben ajar ajr amadan batte gijgijtabenji. Amben hangam adhanaten mandrengnaben: sarwm lanangen Kitungan abmele orde bo bigardanji abmele kun asanurwman.

Ambendaman ogandile gijba dile dinna Kitungan amangba, do ualba amben sarwm anagurpo bigardaji a d’ong Kitungan a tanimyiman amaimaiben. Orde amben bigardanji abmele asarumte do Kitungan ahiman agabroite. Mandrengna-ling-ben Kitungan ahiman tarben dete, mandrengnaben batte.

Tanahimdam Kitungan a onagji, mandrengnaben absuiben dete, Kitungan abanantongan do manaridan batte, amben bo sarwm lanangadaman adete Kitungan abmele.

Okiy Kinolbe absele: “Bindo ayengan a Kitungan dile tordong Kristun batte dainagod lingan abanjengtalen, do dile darakuna lingan Anin a ganalam sanarwman anlen batte abpemengte, Anin a d’ong sanensenan de-ete” (2 Korintia 2:14).