Feb 24 – Dernan!

“Hen derrenai, anten asan hen oblenglai,’ gamle anidolan dele, Ettegoi a dernan a janggardan anion a hanglaian asan anlen janang derrenai, anten asan anlen a oblengtai” (2 Korintian 4:13).

Bibol-lingan anlen kinole raptitabe unji dernanji abmele. Aboi-lingan, murdadaman a dernan. Anab-bagu lingan, dernan, kan aboi hananghangan aberna. Kitungan amangba a dernan. Anab-yagi-lingan, dernalen daku, Janggardan a taniytiyan. Do anab-unji lingan, anlen kinoltabe dernan abmele, Janggardan a J’on.

Derna aboi jznjzn murdam di-dargamlen. Amben derna-lingan dakunaben dete. manglingben dernan dakuben dete do Janggardadage a j’on batte dernan. Jisun a hanangnamaranji janang himdamlingji do dernan batte garberan abatengben dete (Luk 17:5).

Kitungan Jisun Marthan do Mary amangling a dernanji abargutulben dete gamle ogandile ayengan a buhangan a kahidlen adnang, derna ted-den orde derdernan. Kitungan a d’onganji gameten: “Hen na hanarmengan do mandrengna. Butente derten mangling-Hen, anin kadhidle janang, anin yarmengte. (Jon 11:25). Kan a berna aoblingle atiki, amanganji dernan adakuad. Aninji Jisun a d’ong gamleji: “Kitung, bogad aman tidne dakulamanden, buhangan-hen pedde adkahide-beih”. Aninji kan ambrij gameleji: “Hen galamtai atanakud-lingan Anin yarmengte atanakud dinna-lingan.” kun ayam aninji amanglen dirna adakuad. Derna abmele ahanghangben, Lajar a d’ong adharmenglen karahidan saring.

Kan batte dernalen abawrte, engale anlen kinoltaben ruang-baranji abmele Kitungan a lumeten ate. Angante anlen kinoltabe sakkiberanji Kitungan ranapti batte alumeten ate, dernalen radudam deben dete. bibolan gamte Stepen derna do Marid Janggardan batte barij dele. Anten asan anin surda ruamang baranji lumle do bo bangsa maran ambrij dakule.

Angante derna dungte manglingben, Marid Janggardan ataniytiyan ambrij, amben surda do rumangbaranji Kituungan oskaite. Derna sayamte bo surda ranukkun abdiben, ateng pwrardanji ahangben, orde rumang baranji alumben mandranji amangling. Ayengan amandranji jaleji aninji lumle raptiteji.

Tanahimdam Kitungan a onagji, dernan manglingben saring yiraiben dete Kitungan aberna batte. Do dernaben Kristun batte dakunaben dete.

Okiy Kinolbe absele: “Bar janang derna batte Saranna, insalonji a ukka ayaman a padalen adnang pangg’uronben asan ranaptin hangeten, iten asan gamlenden butente sibdaijeten, Anin dernadage na, gamle anin oganleten” (Ebri 11:11).