Feb 05 – Banantongan!

“Daudo a j’e lingan gamdamneten, Bo dinna Sol d’ong-hen kabhidtih. Anten asan hen Pilisti desan aduduge yerrenden hen apsele bangsa” (1 Samuel 27:1).

Daudo Sol a d’ong bantongle. Anin a j’e-lingan ogalle bo dinna orde boa yam mandrengna-hen Sol a s’iling s’itih. Anten asan, anin  yirle sidle oante Sol a d’ongan adrabage, do bangsale anin mengling raptite.

Nami janang, ateng Kitungan a badloihmaranji banantongan batte dakuji – ranoitadan saring aganalu, dayergudlen do pintu-lingan ganalu, ranoitadan saring pansardi baralingan ganalu. Gamlenden sonuman a d’ongji tanunjing-lingan akurtn batte. Sonuman agaja adnogandie ayngan amandranji pintu-lingan dakuji, bindo badloihmaranji a d’onga gadluben saile dakuten.

Angante Herodo a dangrdinonan tonsengling a uan a d’ong abm’oihle dakueten, anin agaja adgarad tungar rajaman tiying gamle. Anin garle tabubda Jonan ababan. Kun ate sonuman sattang alumte abaran ranoitadmaranji amangling. Bar aten asan badloihmaranji agadluben apsele saile dakuten, aninji atanakudan sikoija tanangle dakulen raptiteji orde aninji atanakud-lingan galuteji.

Daudo Sol alankkaling batongle kan ambrijna. Ogandile bo dinna Sol a d’ongan kabhidte, do anin bo bangsa darakunaba adakunaben itsumle, Pilistian desaba yireten. Anin kun a desa a raja a d’ongan gadlamle anin tette a dakunaben asan, bogad anin kun raja amang saring sanayaman hagetenden.

Yan a kanalkal Daudo amandrengna lingan, ayengan amandran itente janang Kitungan amangba ahangte amandra garetenden – kuddub sanidta batte, nami anin pilistainji a raja amangba atanang daku, butente anin idjated aldung desalingan. Anten asan, rajan anordin tiyle, do Daudo ateng tanunjingan sandle dakule.

Bindo iten alumben daku Daudo apsele? Anin Kitungan amangba yarnaiten do tiydamneten, do anin Jordon gardaban dakuneten. Do Kitungan a d’ongan apaile abasuben asan Hebron gardaban. Hebron aboi desan ayengam adarakunaban saring a d’ongan janababan dele raja gamle. Hebron gamlenden ‘kapardan’. Hebron lingan, Kitungan Daudo a kapardan lingan, Anin a d’ong abdaina dele do anabpamengan dele.

Tanahimdam Kitungan a onagji, angante amben tanunji lingan galutabe do kanalkala-lingan, mandran a sanayam asaidong. Bindo Kitungan a d’ong saile anamnan batte garberlen dakunaba. Ajardin gamle Kitungan d’ongben abdainabenten.

Okiy Kinolbe absele: “Aman d’ong-hen hanang-Nam batte apsuigodtih, do tanakud ayam lingan Aman d’ong-hen anabgugun batte jatih” (Sanenken 73:24).