ಆಗಸ್ಟ್ 31 – ನೂತನ ಸ್ವಭಾವವನ್ನು ಧರಿಸಿಕೊಳ್ಳಿರಿ!
elim admin“ನೀವು ನಿಮ್ಮ ಹಿಂದಿನ ನಡತೆಯನ್ನು ಅನುಸರಿಸದೆ ಪೂರ್ವಸ್ವಭಾವವನ್ನು ತೆಗೆದುಹಾಕಿಬಿಡಬೇಕು; ಅದು ಮೋಸಕರವಾದ ದುರಾಶೆಗಳಿಂದ ಕೆಟ್ಟುಹೋಗುವಂತಹದ್ದು. ನೀವು ನಿಮ್ಮ ಆಂತರ್ಯದಲ್ಲಿ ಹೊಸಬರಾಗಿ ನೂತನ ಸ್ವಭಾವವನ್ನು ಧರಿಸಿಕೊಳ್ಳಿರಿ” (ಎಫೆಸ 4:22–24).
ನೀವು ದೇವರ ಶಕ್ತಿಯಿಂದ ಹೊದಿಸಲ್ಪಡಲು ಬಯಸುವುದಾದರೆ, ಮೊದಲು ನೂತನ ಸ್ವಭಾವವನ್ನು ಧರಿಸಿಕೊಳ್ಳಬೇಕು. ಆಗ ಮಾತ್ರ ನೀವು ಎದ್ದು ಕರ್ತನ ಸೇವೆ ಮಾಡಲು ಸಾಧ್ಯವಾಗುತ್ತದೆ. ಪೂರ್ವ ಸ್ವಭಾವವು ವಂಚನೆಯ ದುರಾಶೆಗಳಿಂದ ಕೆಟ್ಟುಹೋಗಿದೆ, ಆದರೆ ನೂತನ ಮನುಷ್ಯನು ನೀತಿಗೆ ತಕ್ಕಂತೆ ಸೃಷ್ಟಿಸಲ್ಪಟ್ಟಿದ್ದಾನೆ (ಎಫೆಸ. 4:22). ಒಬ್ಬ ವ್ಯಕ್ತಿಯೊಳಗೆ ಈ ಹೊಸ ಆಂತರಿಕ ಮನುಷ್ಯನನ್ನು ಸೃಷ್ಟಿಸುವವನು ಕರ್ತನೇ ಆಗಿದ್ದಾನೆ.
ಆದಕಾರಣ, ಯಾರಾದರೂ ಕ್ರಿಸ್ತನಲ್ಲಿದ್ದರೆ, ಅವನು ನೂತನ ಸೃಷ್ಟಿಯಾಗಿದ್ದಾನೆ. ಪೂರ್ವ ಸ್ವಭಾವವು ಹೋಗಿ ಎಲ್ಲವೂ ನೂತನವಾಯಿತು. ನಿಮ್ಮ ಜೀವನದಿಂದ ಹಳೆಯ ಕಾರ್ಯಗಳನ್ನು ತೊರೆದುಬಿಡಿರಿ ಮತ್ತು ಕ್ರಿಸ್ತನ ನೀತಿಯನ್ನು ಧರಿಸಿಕೊಳ್ಳಿರಿ. ಕರ್ತನು ಕುರುಡನಾದ ಬಾರ್ತಿಮಾಯನನ್ನು ಕರೆದಾಗ, ಅವನು ತಕ್ಷಣವೇ ತಾನು ಧರಿಸಿದ್ದ ನಿಲುವಂಗಿಯನ್ನು ಬಿಸಾಡಿದನು. ಪರಿಣಾಮವಾಗಿ ಅವನು, “ನನಗೆ ಇನ್ನು ಆದಾಮನ ಉಡುಪು ಬೇಡ. ನನಗೆ ಇನ್ನು ಹಳೆಯ ಪಾಪದ ಸ್ವಭಾವ ಬೇಡ. ನನ್ನ ಸ್ವಂತ ನೀತಿಯು ಹೊಲಸಾದ ಬಟ್ಟೆಯಂತಿದೆ. ಕರ್ತನು ಕೊಡುವ ರಕ್ಷಣೆಯ ಉಡುಪು ನನಗೆ ಸಾಕು” ಎಂದು ಹೇಳುತ್ತಿದ್ದನು. ಆ ನಂಬಿಕೆಯಿಂದ ಅವನು ಕ್ರಿಸ್ತನ ಬಳಿಗೆ ಹೋದನು.
ಪಶ್ಚಾತ್ತಾಪಪಟ್ಟು ತಂದೆಯ ಬಳಿಗೆ ಹಿಂತಿರುಗಿದ ದಾರಿತಪ್ಪಿದ ಮಗನ ಹೊಲಸಾದ ಉಡುಪುಗಳನ್ನು ತೆಗೆದುಹಾಕಿ, ಅವನಿಗೆ ಶ್ರೇಷ್ಠವಾದ ನಿಲುವಂಗಿಯನ್ನು ತೊಡಿಸಲಾಯಿತು (ಲೂಕ 15:22). ವಿಸರ್ಜಿಸಬೇಕಾದ ಉಡುಪುಗಳನ್ನು ನೀವು ಮೊದಲು ತೆಗೆದುಹಾಕದ ಹೊರತು, ದೇವರು ನಿಮಗೆ ಕೊಡಲು ಬಯಸುವ ಹೊಸ ಆತ್ಮಿಕ ಉಡುಪುಗಳನ್ನು ನೀವು ಧರಿಸಿಕೊಳ್ಳಲು ಸಾಧ್ಯವಿಲ್ಲ.
ಆದಾಮ ಮತ್ತು ಹವ್ವಳು ದೇವರ ಮಹಿಮೆಯನ್ನು ಕಳೆದುಕೊಂಡ ನಂತರ, ಅಂಜೂರದ ಎಲೆಗಳಿಂದ ಮಾಡಲ್ಪಟ್ಟ ಉಡುಪುಗಳನ್ನು ಧರಿಸಿಕೊಂಡರು. ಆದರೆ ಕರ್ತನು ಅವರಿಗಾಗಿ ಚರ್ಮದ ಉಡುಪುಗಳನ್ನು ಮಾಡಿದನು. ಅದೇ ರೀತಿಯಲ್ಲಿ, ನೀವು ಆತ್ಮಿಕ ಉಡುಪುಗಳಿಂದ ಹೊದಿಸಲ್ಪಡುವಂತೆ ಯೇಸು ಶಿಲುಬೆಗೇರಿಸಲ್ಪಟ್ಟನು. ಈಗ ನೀವು ದೇವರ ಕುಟುಂಬಕ್ಕೆ ಸೇರಿದವರಾಗಿದ್ದೀರಿ. ನೀವು ರಾಜಾಧಿರಾಜನ ಮಕ್ಕಳೂ ಆತನ ರಾಜ್ಯದ ಬಾಧ್ಯಸ್ಥರೂ ಆಗಿದ್ದೀರಿ. ಕರ್ತನು ನಿಮ್ಮ ಉಡುಪುಗಳ ಬಗ್ಗೆ ಕಾಳಜಿ ವಹಿಸುತ್ತಾನೆ; ಆತನು ನಿಮ್ಮನ್ನು ಮಹಿಮೆಯುಳ್ಳ ಆತ್ಮಿಕ ವಸ್ತ್ರಗಳಿಂದ ಅಲಂಕರಿಸಲು ಬಯಸುತ್ತಾನೆ.
“ಚೀಯೋನೇ, ಎಚ್ಚರಗೊಳ್ಳು, ಎಚ್ಚರಗೊಳ್ಳು,” ಎಂದು ಹೇಳುವ ಕರ್ತನು, “ನಿನ್ನ ಸುಂದರ ವಸ್ತ್ರಗಳನ್ನು ಧರಿಸಿಕೊ” ಎಂದೂ ಆಜ್ಞಾಪಿಸುತ್ತಾನೆ. ಎಲ್ಲಕ್ಕಿಂತ ಮಹಿಮೆಯುಳ್ಳ ಆತ್ಮಿಕ ವಸ್ತ್ರವು ಕ್ರಿಸ್ತನೇ ಆಗಿದ್ದಾನೆ. ಆದ್ದರಿಂದ, ಕ್ರಿಸ್ತನನ್ನು ಧರಿಸಿಕೊಳ್ಳಿರಿ. “ಕ್ರಿಸ್ತನಲ್ಲಿ ಸೇರುವದಕ್ಕೆ ದೀಕ್ಷಾಸ್ನಾನ ಮಾಡಿಸಿಕೊಂಡಿರುವ ನೀವೆಲ್ಲರೂ ಕ್ರಿಸ್ತನನ್ನು ಧರಿಸಿಕೊಂಡಿರಿ” (ಗಲಾತ್ಯ. 3:27).
ಸತ್ಯವೇದವು ನಮ್ಮನ್ನು ಹೀಗೆ ಬೋಧಿಸುತ್ತದೆ: “ದೇಹದ ಆಶೆಗಳನ್ನು ಪೂರೈಸುವದಕ್ಕಾಗಿ ಚಿಂತಿಸದೆ ಕರ್ತನಾದ ಯೇಸುಕ್ರಿಸ್ತನನ್ನು ಧರಿಸಿಕೊಳ್ಳಿರಿ.” (ರೋಮಾ 13:14) ಕ್ರಿಸ್ತನನ್ನು ಧರಿಸಿಕೊಳ್ಳುವುದು ಎಂದರೆ ಆತನ ಸ್ವಭಾವವನ್ನು ಮತ್ತು ಗುಣವನ್ನು ಧರಿಸಿಕೊಳ್ಳುವುದಾಗಿದೆ. ಆತನ ಎಲ್ಲಾ ಸದ್ಗುಣಗಳಿಂದ – ಆತನ ಕರುಣೆ, ಅನುಕಂಪ, ದಯೆ, ಕನಿಕರ, ಪ್ರೀತಿ, ಸಂತೋಷ ಮತ್ತು ಪರಿಶುದ್ಧತೆಯಿಂದ ನೀವು ಹೊದಿಸಲ್ಪಡಬೇಕು.
ಯೇಸು ತನ್ನ ಶಿಷ್ಯರ ಪಾದಗಳನ್ನು ತೊಳೆಯುವ ಮೂಲಕ ನಿಜವಾದ ದೀನತೆಯನ್ನು ತೋರಿಸಿದನು. ಆತನು ದೀಕ್ಷಾಸ್ನಾನ ಪಡೆಯಲು ಸ್ನಾನಿಕ ಯೋಹಾನನ ಬಳಿಗೆ ಬರುವ ಮೂಲಕ ತನ್ನನ್ನು ತಗ್ಗಿಸಿಕೊಂಡನು. ನಿನ್ನಲ್ಲಿ ಆ ದೀನತೆಯು ಇದೆಯೇ?
ಮುಂದಿನ ಅಧ್ಯಾಯನಕ್ಕಾಗಿ ದೇವರ ವಾಕ್ಯ: “ನಾನು ಧರ್ಮವನ್ನು ಧರಿಸಿಕೊಂಡೆನು, ಧರ್ಮವು ನನ್ನನ್ನು ಧರಿಸಿತು, ನನ್ನ ನ್ಯಾಯವೇ ನನಗೆ ನಿಲುವಂಗಿಯೂ ಮುಂಡಾಸವೂ ಆಗಿತ್ತು.” (ಯೋಬ 29:14)
