ಅಕ್ಟೋಬರ್ 14 – ಜ್ಞಾನೋಕ್ತಿಗಳು!

“ಇವುಗಳಿಂದ ಜನರು ಜ್ಞಾನವನ್ನೂ ಶಿಕ್ಷೆಯನ್ನೂ ಪಡೆದು ಬುದ್ಧಿವಾದಗಳನ್ನು ಗ್ರಹಿಸಿ ವಿವೇಕಮಾರ್ಗದಲ್ಲಿ ಅಂದರೆ ನೀತಿನ್ಯಾಯಧರ್ಮಗಳಲ್ಲಿ ಶಿಕ್ಷಿತರಾಗುವರು…” (ಜ್ಞಾನೋಕ್ತಿ 1:2–3)

ಲೋಕದ ಎಲ್ಲಾ ಜ್ಞಾನಿಗಳಲ್ಲಿ ಸೊಲೊಮೋನನು ತನ್ನ ಅಸಾಧಾರಣ ಜ್ಞಾನಕ್ಕಾಗಿ ಪ್ರಸಿದ್ಧನಾಗಿದ್ದನು. ಆದರೂ, ಸಣ್ಣ ವಯಸ್ಸಿನಲ್ಲೇ ಅವನು ತನಗೆ ಒಪ್ಪಿಸಲ್ಪಟ್ಟ ಉನ್ನತವಾದ ಅರಸನ ಪದವಿಯ ಜವಾಬ್ದಾರಿಯ ಬಗ್ಗೆ ಮತ್ತು ಅದನ್ನು ನೆರವೇರಿಸಲು ತನ್ನ ಅಸಮರ್ಥತೆಯ ಬಗ್ಗೆ ಆಳವಾಗಿ ತಿಳಿದುಕೊಂಡಿದ್ದನು. ಆದ್ದರಿಂದ, ಅವನು ದೇವರ ಜನರನ್ನು ಸರಿಯಾಗಿ ನ್ಯಾಯ ತೀರಿಸುವುದಕ್ಕೂ ಒಳ್ಳೆಯದನ್ನು ಕೆಟ್ಟದ್ದನ್ನು ವಿವೇಚಿಸಿ ತಿಳಿದುಕೊಳ್ಳುವದಕ್ಕೂ ತನಗೆ ಜ್ಞಾನವನ್ನು ದಯಪಾಲಿಸಬೇಕೆಂದು ದೇವರನ್ನು ಕೇಳಿಕೊಂಡನು.

“ಆದದರಿಂದ ಅದನ್ನು ಆಳುವದಕ್ಕೂ ನ್ಯಾಯಾನ್ಯಾಯಗಳನ್ನು ಕಂಡುಹಿಡಿಯುವದಕ್ಕೂ ನನಗೆ ವಿವೇಕವನ್ನು ದಯಪಾಲಿಸು. ಈ ಮಹಾ ಜನಾಂಗವನ್ನು ಆಳಲು ಸಮರ್ಥರು ಯಾರು ಎಂದು ಬೇಡಿಕೊಂಡನು.” (1 ಅರಸು 3:9)

ಕರ್ತನು ಸೊಲೊಮೋನನ ಮನವಿಯನ್ನು ಕೇಳಿ ಸಂತೋಷಪಟ್ಟನು. ಆಯುಷ್ಯ, ಸಂಪತ್ತು, ಐಶ್ವರ್ಯ ಅಥವಾ ಶತ್ರುಗಳ ಜೀವವನ್ನು ಕೇಳದೆ, ನ್ಯಾಯವನ್ನೂ ತೀರ್ಪನ್ನೂ ವಿಂಗಡಿಸಲು ಜ್ಞಾನವನ್ನು ಕೇಳಿದ್ದರಿಂದ, ತಾನು ಅವನಿಗೆ ಅಸಾಧಾರಣವಾದ ಜ್ಞಾನ ಮತ್ತು ವಿವೇಕದ ಹೃದಯವನ್ನು ನೀಡುವುದಾಗಿ ದೇವರು ಅವನಿಗೆ ಹೇಳಿದರು (1 ಅರಸುಗಳು 3:10–12).

ನೀತಿ, ನ್ಯಾಯ ಮತ್ತು ತೀರ್ಪುಗಳಿಗೆ ಮಹತ್ವ ನೀಡುವ ಕರ್ತನು, ನಿಖರವಾಗಿ ಇದೇ ಉದ್ದೇಶಕ್ಕಾಗಿ ಸೊಲೊಮೋನನಿಗೆ ಜ್ಞಾನವನ್ನು ನೀಡಿದನು. ಅದೇ ರೀತಿಯಲ್ಲಿ, ನಿಮ್ಮ ಜೀವನದಲ್ಲಿಯೂ ಸರಿಯಾಗಿ ಬದುಕಲು ಮತ್ತು ನ್ಯಾಯವನ್ನು ನಡಿಸಲು ನಿಮ್ಮ ಹೃದಯವನ್ನು ತಿರುಗಿಸಿದಾಗ, ಕರ್ತನು ನಿಮಗೆ ಜ್ಞಾನವನ್ನು ನೀಡುವನು. ಹಾಗಾದರೆ, ನೀತಿ ಮತ್ತು ನ್ಯಾಯಗಳು ಎಷ್ಟು ಮುಖ್ಯವಾಗಿವೆ!

ಕುತೂಹಲಕಾರಿಯಾಗಿ, ಸೊಲೊಮೋನನು ತಾನು ಬರೆದ ಪುಸ್ತಕಕ್ಕೆ “ಜ್ಞಾನದ ಮಾತುಗಳು” ಎಂದು ಹೆಸರಿಡಲಿಲ್ಲ. ಅದಕ್ಕೆ “ಜ್ಞಾನೋಕ್ತಿಗಳು” ಎಂದು ಹೆಸರಿಸಲಾಗಿದೆ. ಅದರಲ್ಲಿ ನಾವು ನೀತಿ, ನ್ಯಾಯ, ತೀರ್ಪು ಮತ್ತು ಸೌಮ್ಯ ವಿವೇಕಕ್ಕೆ ಸಂಬಂಧಿಸಿದ ಬೋಧನೆಗಳನ್ನು ಕಾಣುತ್ತೇವೆ (ಜ್ಞಾನೋಕ್ತಿ 1:3).

ಕರ್ತನು ಸೊಲೊಮೋನನನ್ನು ನೀತಿ ಮತ್ತು ನ್ಯಾಯಕ್ಕೆ ಸಂಬಂಧಿಸಿದ ಜ್ಞಾನದಿಂದಲೂ ವಿವೇಕದಿಂದಲೂ ತುಂಬಿಸಿದ್ದರಿಂದ, “ಅವನ ಜ್ಞಾನೋಕ್ತಿಗಳು ಮೂರು ಸಾವಿರ; ಗೀತಗಳು ಸಾವಿರದ ಐದು.” (1 ಅರಸು 4:32)

ನಂತರ, ಯೆಹೂದದ ಅರಸನಾದ ಹಿಜ್ಕೀಯನ ಮಕ್ಕಳು ಸೊಲೊಮೋನನು ನುಡಿದ ಹೆಚ್ಚುವರಿ ಜ್ಞಾನೋಕ್ತಿಗಳನ್ನು ಸಂಗ್ರಿಹಿಸಿ ಸಂಪೂರ್ಣ ಸಂಕಲನವನ್ನು ಮಾಡಿದರು (ಜ್ಞಾನೋಕ್ತಿ 25:1). ಹೀಗೆ, ತಲೆಮಾರುಗಳ ಮೂಲಕ, ದೇವರ ಈ ನುಡಿಗಳು ಕರ್ತನ ನೀತಿ ಮತ್ತು ನ್ಯಾಯದ ಮಾನದಂಡಗಳನ್ನು ಸಾರುವುದನ್ನು ಮುಂದುವರೆಸಿವೆ.

ಒಬ್ಬ ವ್ಯಕ್ತಿಯು ದೇವರ ವಾಕ್ಯದ ಪ್ರಕಾರ ತನ್ನ ಜೀವನವನ್ನು ಕಟ್ಟಿಕೊಂಡಾಗ, ಅವನು ನೀತಿವಂತನಾಗುವುದು ಮಾತ್ರವಲ್ಲದೆ ಜ್ಞಾನಿಯೂ ಪರಿಶುದ್ಧನೂ ಆಗುತ್ತಾನೆ. ಅಂತಹ ವ್ಯಕ್ತಿಯು ಜ್ಞಾನೋಕ್ತಿಯನ್ನೂ ಅದರ ಅರ್ಥವನ್ನೂ, ಜ್ಞಾನಿಗಳ ನುಡಿಗಳನ್ನೂ ಮತ್ತು ಅವರ “ಒಗಟುಗಳನ್ನು” ಅಥವಾ ರಹಸ್ಯ ಮಾತುಗಳನ್ನು ಅರ್ಥಮಾಡಿಕೊಳ್ಳುವನು ಎಂದು ದೇವರ ವಾಕ್ಯವು ತಿಳಿಸುತ್ತದೆ (ಜ್ಞಾನೋಕ್ತಿ 1:6).

ಪ್ರಿಯ ದೇವರ ಮಕ್ಕಳೇ, ದೇವರ ವಾಕ್ಯವನ್ನು ನಿಮ್ಮ ಜೀವನದ ಅಸ್ತಿವಾರವನ್ನಾಗಿ ಮಾಡಿಕೊಳ್ಳಿರಿ. ಆತನ ಜ್ಞಾನವು ನಿಮ್ಮ ನಿರ್ಧಾರಗಳನ್ನು ಮಾರ್ಗದರ್ಶಿಸಲಿ, ಆತನ ನೀತಿಯು ನಿಮ್ಮ ನಡವಳಿಕೆಯನ್ನು ಆಳಲಿ, ಮತ್ತು ಆತನ ನ್ಯಾಯವು ನೀವು ಇತರರನ್ನು ನಡೆಸಿಕೊಳ್ಳುವ ರೀತಿಯನ್ನು ರೂಪಿಸಲಿ. ನೀತಿಯು ನಿಮ್ಮ ಜೀವನದ ಮಾದರಿಯಾದಾಗ, ಶಾಂತಿಯು ನಿಮ್ಮನ್ನು ಹಿಂಬಾಲಿಸುತ್ತದೆ.

ಮುಂದಿನ ಅಧ್ಯಾಯನಕ್ಕಾಗಿ ದೇವರ ವಾಕ್ಯ: “ಧರ್ಮದಿಂದ ಸಮಾಧಾನವು ಫಲಿಸುವದು, ಶಾಂತಿ ನಿರ್ಭಯಗಳು ಧರ್ಮದ ನಿತ್ಯಪರಿಣಾಮವಾಗಿರುವವು.” (ಯೆಶಾ 32:17)