Mar 22 – Aman Riangba Gijgija!

“Antatiki Anin anin a d’ong baiyeran amdungle gameten, bogad aman riangan gijle, tuituijanji a d’ong rapti disamlenden, etteden opunga. Anin okij gameten, Ettegoi na birinda-nam dete” (Aparamangtan 15:5).

Kitungan abadloyim-maranji rianganba gijgijleji, do Kitungan a d’ong gijleji riangban, a Rajaman do aganugun. Ahimanji mandrengna kamb’ol-lingan anidolan dele. U’an Kitungan raja garobgob-lingan daku. Do Kitunglen Jisun Kristun a jandrum s’iban daku. erahidan adane daku anlen abmele. Bindo kan oradar-lingan amandranji, mengtenji do kahiteji nami sattang abmele aninji.

Bo pasijang dakule a s’ing-lingan lanankaban saring arandidna abengle. Lanaka-lingan yaryarmanengba kitalan addakuad. Kun pasijan amadan kun arandidna-lingan dakule, anin kuddub barij andidna-lingan dakule. Kun ambrij, ateng mandranji oradage jananb-lingan tiyj’etenji kudduban ate karidateji itente jinjin murdadam. Do iten asan, aninji Kitungdage asanabyun abs’idleji, do dimadlen s’idleji kan atanakud ayam-lingan.

Angante Abram gijgijten ruanganba, anin gijle rabtile amad-daman batte ruangan-lingan tuituijanji. Do a tikki Kitungan a d’ongan gamle mangnam saring birindanamji yirtai, anin lumle kan ate. do angante anin ajar ajar pasijanji. Anin gijte ateng taganji adungtenaih ate, ateng desanji do teganji Kitungan a d’ong abgugutenji.

Anin janang gijle Kitungan Jisun Kristun a d’ong, tagaldan asunkaran ambrij do apuangle barij manengba, a tegan saaring. Anin a tegan gijle Kitungan a d’ong aagankiltenji ate ruangan-lingan. bibolan gamte: “Bo birindan Anin a d’ong gangkilte, do a yertain arsangkud birindan a d’ong Gamangtungan abmele aninji ablengteji” (Sanenken 22:30).

Tanahimdam Kitungan a onagji, amben janang Abram a pasijanji, a tegan saring ayirlaih a derna do janardi anabgugu-marji Kitung-lingan. Abram saring, amben janang anabsittan ahangte. Ateng asan, gijba dernan batte madben daman ruanganban gijgijba. Sanenken Daudo gamte: “Hen barubanji teredmadlen gijgijtai; uan saring sanaiyam-hen yertai? Sanaiyam-hen Gamangtungan amang saring yertai; Anin riangan do ordaran gabdelle” (Sanenken 121:1-2).

Okiy Kinolbe absele: “Kan a bernan Jisun opungeten, do riangban teredmadlen gameten, E Uang, antardual yerrai On-Nam abgugule abpemenga, yante gamle engale kuddub mandranji a lanangka danen a hangben Anin a d’ong Aman tiyle, anten asan On-Nam rapti abgugule abpemengtam” (Jon 17:1-2).