Mar 21 – Anin Anlen ambrij dele!

“Anten asan engale passijanji sarigoi jelun do miham lingan arturduleji, ‘ ettegoi Anin janang san’goi jelun do miham lingan arturdueten, yante gamle karahidan batte Anin karahidan a danen a hamlen a mandran, manan, duaih suman a d’ong rapti abs’zdte.” (Ebri 2:14).

Kitunglen Janggardan-lingan daku. Anin na Janggardan, ordarban yirai do karukkudan dele, d’ongdage do mihaman batte. Yan abangsa kan ate agalamben abmele! Yan asurda tiydamna kan ate Kitungan a Onan gamle dele, mandra d’ongan hangdamlen, do ordar-lingan halen!!

Bo palu maran daku a himan Jon Howard Griffin, ayengan amandran bo surda tanimhiman dakule do asuyeman haga maranji amangba. Anin ablule a j’e-lingan, bogad anin hagamardelenden, anin a d’onganji Kristun abmele orungtai po, anin aninji a moihanji ambrij dakulen. Ateng asan, anin bo surdadage aninji ampara royongan abs’idle do aninji ambrij janang haga abmedamtenben. Ateng janabanji a d’ong-lingan jodlen, a d’ongan akoloran abandanaben asan do daga-lingan tababan dakule. Enegoi janabanji jodlen a d’ong-lingan, haga abmenaben asan. Bindo anin.

Angante anin a d’ongan haga dele engale haga maranji ambrij, anin a dongan janang anabgandrojan hangle palu maranji batte. Baso-lingan ayirben a d’ongan buteja adjaedji palu maranji batte. Bindo anin sahile dakulen mandrandaman asan, amangan haga maranji atanimyiman adakulen asan.

Kun Jon Howard Griffin ambrij anindaman kun mandranji asan tiydamlen Kitunglen abmele engale Kitunglen anindaman mandrandaman batte ordarban yirai, anlen abmele. Ogandile gijba Anin anlen abmele kuddub lingan yirle pintulenji do erselenji pangdamlen. Kun atiydamna bangsale d’onglen gamte: “Bindo anosai manedde-len apsele Anin a d’ong panopon dele, danusa-lenji apsele Anin panaran dele; Anin a langka, sanabyu-len apselen asaan, panadradan anabtengan dete, bar Anin a panaran batte anlen sanamangan detabe” (Jisaiya 53:5).

Anin kan kudduba pangdamlen, idba ranubaban, arakadanglingan tangleji do amihaman lale, danusalenji do pintuleji asan.

Bibolan gamte: “Iten asan gamlenden anlen a banalaian abmele arturdu-imna-ben asan anlen a gugu buyan adraptie, ette ted. Bindo pintun a lanuman sadan sadle anlen ambrij kudduban abmele Anin tanungjengan dele” (Ebri 4:15). Tanahimdam Kitungan a onagji, amben ogandiben dete jaru gamle abguguben do asenkenraben ruangan do ordaran agabdilen a Kitung, anlen Anin deandele, anlen ambele a d’ongan tiydamneten!!

Okiy Kinolbe absele: “Anten asan engale passijanji sarigoi jelun do miham lingan arturduleji, ‘ ettegoi Anin janang san’goi jelun do miham lingan arturdueten, yante gamle karahidan batte Anin karahidan a danen a hamlen a mandran, manan, duaih suman a d’ong rapti abs’zdte. Bar yante gamle bute bute karahidan a banantongan asan k’id m’eng sikkoi ja tanolbad Iingan deleji, aninji a d’ong Anin rapti aburte.” (Ebri 2:14-15).