Mar 09 – Anin Amdangte!

“bogad buteja Kitungan a ganangkil maran dete, do Anin a itsuman abojorailenden, anin a bernan Kitungan amdangte” (Jon 9:31).

Angante amben Kitungan a itsuman asaite do kun ambrij, etiden Kitungan garberben amdangte. Anin kuddub a baranji abojoraite U u do Amen gamle. Angante amben a itsuman alumte, Anin engajang d’ongben amdangte.

Nami kan ambrij a berna buten gabdile? Kan a berna kardu-maran akarukudan saring, do amadan Kitungan Jisun batte anab-bangsa dele. Parusinji do sadukinji a d’ong kan ambrij annual bran dakule. Anlen kinoltabe itente Anin ayerberle Jon 9:31 lingan daku. “Kitungan pintu maranji a bernan adnamdange, antate anlen galamtabe. Bindo bogad buteja Kitungan a ganangkil maran dete, do Anin a itsuman abojorailenden, anin a bernan Kitungan amdangte” (Jon 9:31).

Raja Daudo anindaman surpidamlen Kitungan a itsuman abojoraiben asan. Bibolan gamte: “Itente anin a j’e lingan itsumle, antate Aman anin a d’ong tiyle; anin a usaltaman a labyu garberan Aman adnardead” (Sanenken 21:2). J’e a itsuman, anogandin do itente ogalte ranoitadan abmele kun ate janajadage Kitungan amang saring. “ranoitad maranji anogandi hadabna….” (Bangsa Hanang 12:5).

Garberna ling-ben ambendaman tungjingdamnaba, kanalkalan abmele, danusanji abmele etiden kudduban Kitungan obsadte. Raja Solomon agarberan Kitungan itsumle. Do Kitungan gameten: “Gijja, Hen lumlai bernanam ambrij”. Angante danuaihan dakute j’e lingan, Kitungan garberben adnamdage. Kun ayam-ling, “Anin a tam itsuman ambrij bogad anlen iteja abmele garberrabenden, Anin berna-len amdangte” (1 Jon 5:14).

Angante anlen Kitungan a itsuman lumtabe, anlen lagadj’e batte alumben dete, etiden Kitungan abojoraite Anin ajibjible ambrij. Kan ate dingle janang, Anin ajardina lumte. Anin jzbjzble Abram do Saran a d’ong. Bindo Saran adnomdiad Kitungan ajanibjib beran abojoriben ate. Kitungan ajanibjibanji, anin aboantibojan Hagar a d’ong appaile Abram amangba. Anin ogandile Hagar saring ayirtaih apasijanji saring birindan gabdilte.

Kan ambrij Ismael karukkudan dele. Do kun a dinnan saring namintan sikoija, Israelanji do Ismaelanji ampara sanabyun agasa. Bogad Saran lagad-damlen omdietenden, kan a kudduban adea badih. Tanahimdam Kitungan a onagji, Omdile dakunaba do ambendaman surpid-damnaba barijloge a hanadaban atanangben asan mandrengna-ling-ben.

Okiy Kinolbe absele: “Butente mangba-Hen dernadage dete do kuddub itsum-Hen a baran lumte, ettegoi aboi buya Hen sedatai. Hen anin a d’ong birindanji tiytai, bar anin janabbob mar-Hen a temang dile tordong gangkilte” (1 Samuel 2:35).