Feb 01 – Unth !

Genesis 24:20 titya tai joldi khali korise kolsi laga pani ke unth khan pani jagate, aru polai kene kuha te jaishe pani uthabole, aru unth khan karone pani ani dishe.

Ami khan pobitrokotha te pure ki Eliezer, abrahar laga naukar, bishi unth ke loi jaishe mesapotamia te, tai laga malik laga chokra nimite maiki sai dibole. Tai laga unth khan ke pani khilabole nimite tate nagar laga bahar te hi khara kuribole dishe. Aru Rebekah hi kuha te ahi thaka homoi te dikhi kene tai karone aru tailaga unth khan karone pani uthai dishe.

Jitya ekta unth manu uthai tai nomro hoi kene niche te bohe aru manu uthai. Aru pani khabole nimite bi niche hoi. Ami khan bi inika hi ghutna te ahibole shikibo lage.

Apuni khan bi ghutna te isor laga agete khara kuribole shikibo lage. Ghutna te thaka tu isor laga kotha mana ase. Jitya apuni isor laga agete nomro kuribo, suku te pani thaki kene, isor pora hosa bi apuni laga prathana laga jawab dibo.

Ekbar ekta parivaar tai khan laga chokra nimite maiki sai thakishe, ekta chukri laga khobor paishe aru tai laga ghor jaishe. Utu chukri tu taikhan ahibole laga khobor panai, hodai din nishina tai nijor laga karma te hi thakishe aru ghutna te thaki kene prathana kurishe. Jitya utu chokra laga parivaar pora utu utu chukri ke sabo koishe titya chukri laga ama baba koishe ki chukri tu hodai din ek ghonta karone prathana kure aru  utu homoi te tai kitya bi manu lok nakure. Aru inika koi kene taikhan ke rukhibole dishe.

Aru jitya tai prathana kuri kene ulai ahishe tai laga chehra tu isor laga ujala pora chamki thakishe. isor laga pobitro atma pora hi tai khan  laga mon te anishe ki inika prathana thaka laga chukri kote pabi? Jun hi moti pora bi kimti ase. Utu chokra laga parivar bi khushi hoi kene chukri ke posond kurishe aru rishta bonaishe.

Jitya amikhan bi unth laga bhabna kure, itu pora dikhai kinika malik laga agete dangor hoilebi nomro kuribo lage jitu hi amikhan laga ministry nimite bhal ase. Jitya ama baba pora taikhan laga bacha nimite prathana kuribo, bacha khan ashish pabo. Jitya isor kam kura manu khan ghutna te prathana kuribo, biswasi khan titya hi ujala te berabo. Isor laga bacha khan, jitya apuni prathana kure, hodai din ghutna te thaki kene prathana kuribi. Aru isor laga ashish apuni laga jibon te hobole dibi.

Aji bhabna kuribole laga pobitro kottha tu hoile ephesians 3:14-16 itu karone hi ami ghutna te ahe baba amikhan laga isor jisu krista laga agete, jun pora hi pura porivaar swarg te  aru prithibi te naam ase, ki tai pora hi dibo, tai laga dhon mohima laga hisab te atma laga Shakti dibo.