Jan 31 – Kristun a Banadrijan!

“Yante gamle tiki lingan kuddub-len thungan a Onan a ganalaman do dernan aboinan, manan, mayangmarge dean dele Kristun a banadrijan a lanangkan a tanaredban ardutabe.” (Episi 4:13).

Angante amben Kristulingan barij mayang-mar delaben, amben ajardin na banadrij lingan marangtaben. Do Kitunglen Jisu Kristun anindaman anlen gijle rabtitabe, banaridjan apsele amben ajongleden. Bibolan gamte: “Bar Jisun ganalaman, d’ongan do Kitungan bar mandranji a ganijgij lingan asuyeman batte marangle” (Luk 2:52).

Aparamangta, Anin ganalaman abaurte. Bibolan bangsale gadlamlangten Gamangtungan a banangtongan na ganalaman asusuna. Ayob janang gamte: “Gija, Gmangtungan apsele banantongan, kani na ganalaman; bar anerszn anumdrengan na gananludan” (Ayob 28:28). Sanna baran lumleben janang, ganalaman sanaisai. Bibolan gamte: “Iten asan gamlenden Gamangtungan banuddin tartumte, do Anin a rojol-j’e maranji abmele uddardage dete” (Bangsa Hanang 2:6-7). Jisu Kristunle ambrij, amben amarangben dete do Kitungan a ganalaman abaurben dete.

Anab-bagu lingan, Jisun manarangan abaurte. Kan ate Kitungan aitsuman amben oliba neban ambrij amarangben dete. Anin aitsuman janggardadage amarangben ate na. Anin ateng m’oihte kuddub-lingan amben janggarda-lingan amarangte ate, angante amben Marid Janggardan ataniytiyan ahangte, angante amaben Janggardadage agarberan alumte, orde angante amben sakiberan atiyte bigardanji amangba.

Anab-yagi lingan, Gamangtungan Jisun Kitungan a suyem abaurte. Angante amben a ladgadamten Kitungan do mandran amangba, Kitungan tagortaben hadab asuyemban. Anlen anappai Pol abmele gijle raptitabe: “Bar hen apsele Kristu Jisu lingan a delen a deman d0 tanimyiman batte Gamangtunglen asuyeman karran awrre” (1 Timoti 1:14).

Anab-unji lingan, Jisun abaurte mandran a suyeman. Ateng Kitungan amandranji, gamteji takudle mandran a suyeman. Kitunglen janang, Mari a suyeman sanaisai dele, ayirben do akambunglingan saring akudben asan. Anin sanaisai dele a hanangna maranji a suyeman, aninji ampara baraling do Kitungan a rajam beran aoblingben asan. Anin hamyomaran asuyeman sanaisai dele abungsangba tanangle hanangan atiyben asan. Anten asan, amben janang mandran asuyeman sanaisai. Kitungan tiytaben mandran asuyeman.

Tanahimdam Kitungan a onagji, bogad amben hadab maran, Kristu lingan barij, amben amarangben do ganalaman amarangben dete, Kitungan a manarangan do mandran a suyeman.

Okiy Kinolbe absele: “Bindo bogad mang-ling-ben buteja banuddin sanaisaijan delenden, kuddubanji a d’ong eramuiloge a tiytiylangtenan, do akkaihkaihlangnen a Kitungan amang saring garberete, do anin a d’ong taniyan dete” (Jakuban 1:5).