Mar 23 – VONA MALAMCHA

Vimochaner grandh 3:7 Aigupthema vela karrejako Mar janner bhavetin Ma dittochu, vunder vumper bhari kaam kararener vadithi kidejako Noran samlochu,vunder dhukh sada Manna malam.

Prabhuna thar vicharena bhavetina malamcha. Yekvela jeevanema thu chalarojako vaat thar khasa bapenaj malam chenikaiko. Thar yadi thar vaten valakeniju reja. Lasten yee sari malkaj thon samjeniju reja kaiko. Lapan Maro Prabhu Yesu Christhu kerocha ,’Mar beti beta thuj Manna malam’.

Aigupthema Yisrael jann vunden ghalejako velar vadithi Deven nora kidey. Vo norakidejako Dever dallen badlavni karnaki. Jasij Dev Mosey na vatadan , Aigupthema masaj acham kalar kamen karayo. Ajji Aigupthema masaj haal karan agedi pedavejako chora sey margey. Yisraelevaleper Aigupthevalen dayadakalaju Prabhu kido jethi Yisraeleval chori kidejako kuvatho lelachko hanu Aiguptheval Vunder sono rupo seji denakey. Vosejini perlen dudan mangaler ghee radan jarijako Canaan kajako deshen Rajer dakal jayamethi chalan gey.

Aaj thu sada kunsik bayapanema karan cheniju thar yajamaner heta thakh gochikaiko? Vimochaner grandh 2:25 vachanema kacha ,Dev Yisrael janner sam dekan vunden herdey lalino. Chamkolethi marajethi jada thu marakhan bhandakharochikaiko pan Deven thar vatena  thar velana saha acho malam chakan herdemella.

1 Pethru 5:7 vachanema Vu thamar barema hayi karrojethi ,thamar badhana sey Voper meldo. Thu katho vo Prabhuna Athra jada kaklothi cha jethi thona jathanethi deklacha. Vor hather heta thu kamkarlen rastho yek dad vu Prabhu thona vuncho padacha.

Vutharema jann vunder vela bhavetivuna ann vo padarejako badhana ,vunder ankir hasuna lakmelejako vanchatho hamena masaj kalji thutacha. Vo sejini achethi padan vundersaru prarthana karacha . Ankir hasuthi karajako prarthana Prabhu chamkey samlan javaab dacha.

Mar premer Dever beptavo thu ghat bhandmelojako Yesu Christhu kajako punadhiper hubochikan bhulamath ann kannai thar velabhavetin dekan chamakmath vu Prabhuj thona samadhan dacha.

Ajji jada dhyan karen pado 2 Timothy 2:19 Pan Dever kaato punadhi ghat cha, Prabhu Vorvalena malamkarmelocha, vujji Prabhur namena manlevalo heryeki cheti renu . Kajakon vona mudrar nai cha.