Mar 18 – Anin a Onan tiyaiten!

“Butente a Ondaman a d’ong er rabrablabe kuddub-len apsele Anin a d’ong surpideten, Anin yan’gamle a Onan ampara d’ong-len kuddub janabanji janang abasuyemle attiye po?” (Sanenken 32:8).

Kitunglen kuddub banangsaji tiyaiten. Anin amangan saring yirtai anabsittalen, do kuddub banangsaji janang yirtai. Anin na barun itente anlen hangtabe. Anin na anlen abmele ogandite kuddub-lingan.

Angante Anin ordaran gabdile kuddub ganugun batte tiyaiten. Do lanankkaban saring, Anin a Ondaman tiyaiten, bo surda taniytiyge. Anlen itjaja oblingle adrabtibe Anin a kuddub baranji mangbalen alumle ate Jisun Kristun saring. Kristu-lingan, kuddub janibjinban ji daku, kitungdage asanamangan, kitungdage anabhana, banangsanji, ganugun do panemengan.

Kitungan Jisun anlen apsele tiydamlen, arakadanglingan, aluben; do erahidan amandrengna atiyben abmele. J’eben batte amben adsinepo? “Kitunglen Jisun kun atogal-lingan dakule ayengan a rutipun pangle; do angante Anin senlen, Anin pijle do gamle, “jumba; kanina ate d’ong-hen itente aldungle; kan ambrij lumba aoganditihen adnang.” Kun ambrij Anin pinsa manun pangle do gamle, “Kan a pinsamanun aboi tabme anosaijan miham-ling-Hen. Kan ambrij lumba, engale amben agate, aimtihen adnang” (1 Korintian 11:23-25).

U’a Kitungan a Ondaman tiyaiten, Jisun Kristu anlen apsele. Do Kitungan Jisun, a d’ongdaman tiydamlen, amihaman do a d’ongan arakadang-lingan iten asan gamlenden Anin a surda tanimyiman asan.

Iten asan kuddub banangsanji tiylangten do gugudage kuddub anabsittanji tiylangten? Kan ate Anin aboi surda tanimyiman asan. Bibolan gamte: “Iten asan gamlenden Kitungan ordaran didhe timyimeten do, Anin a min tum Onan tiyeten, yante gamle bute dele janang Anin amang lingan a derten a mandra rapti ads’zde, bindo er ahidan a mandrengnan hangte” (Jon 3:16).

Tanahimdam Kitungan a onagji, bo surda man’oihan j’e-ling-ben yirtai, Anin a surda ahiman asan! Anin gamle: “Itendeleja amben agarte ahimling-Hen, attate lumtai, U’a m’oihten a On-lingan”.

Kitungle Jisun, kalobori-lingan tanangan dele, pintulen asan, Anin hadab abmete Kuddubgod-lingan. nami janang, Anin U’an ajandrum-s’iba dakute, anlen apsele appaiberten, Anin na asuyemlen Murda Buyage, Anin kuddub appaiberten anlen abmele.

Okiy Kinolbe absele: “Bindo dajingante Anin a d’ong jaleji, manan, bute bute Anin ahim lingan derrenji, dijte mandran a d’ong Kitungan a onanji a deben asan Anin ranapti-danen tiyetenji” (Jon 1:12).