Mar 16 – Anin Mukkaba-ben abmanglen yerte!
elimchurchgospel“Iten asan gamlenden Gamangtungan mukkaba-ben abmang abmanglen yerte, bar Israel a Kitungan amben a sanandung mar dete” (Jisaiya 52:12).
Kitungan mukkaba-ben abmanglen yerte, abtagorle, Anin adamban, Rajanji a rajan ambrij. Duai tagoranji anin sarigoi abmete. Anin kuddub tagoranji saru abmete do abtagortaben.
Ateng mandranji bo bigarda disaban ayirben batongteji. Aninji batongteji iten delenten gamle orde abumungdage kanalkalan yirtai gamle. Bindo Kitungan mukkababen abmangten tanimyiman batte do dongrab-benten. Kitungan gamte Hen amben ampara daku dile tordong, mandrengmadtan sikoija (Mattiu 28:20).
Angante birindanji bo bigarda darakunaban yirteji, kulamanji do gardinji anomdaba yirteji a d’onganji appaiben asan. Iten asan gamlenden amanganji tanimyiman adakun asan, iyte junjuneji, itjaja erongandileben, kun dinna-ling orde togal-ling, garunan orde daga dakulejanang. Janardin tanimyiman birindanji abm’oihte.
Angante ordardage a gardinji do kulamanji sagallangtenji mandreng madtan sikoija karahidan sikoija, do anumdrengan tiyteji, ambendaman agijte bo surda Kitungan Jisun atanurdun, itente amang saring ayirtaih r hidan a tanimyiman. Kitungan amben ampara dakuten, mandreng mattan sikoija. Aten asan, amben abantongben sanaisaited.
Mojes, ayengan Israelanji a d’ong abtagorle kanan desaban ayirben apsele, surpid-damlen Kitungan apsele absagallen batturlen halenji. Anin absittale Israel maranji a d’ong engoi gamle: “Tarda Kitungan baradturna-nam d o tarda ayam a s’inji a janaita-nam daku” (Bagujuanaber 33:27).
Yan a rumangdage kan ate Kitungan a onanji gamle aganudingan! Do yang a bangsa Kitungan tarda ayam abaraturnalen. Kan ate boi boi bangsadam sanille asandungben abmele, anin abtagorlangten. A pissirdianji appaile dongdrablangten dile tagorlingan.
Engale amben aihmdamten Kitungan a tanurdun, dile ayam abgugule singkindraba, do atanurdun-lingan dakunaba. Do angante amben alumte do abm’oihte, Anin engajang mukkababen yirte do abtagortaben.
Okiy Kinolbe absele: “Selleten Gamangtungan gameten, Hen aman ampara yerte do d’ong-nam lulunan tiytai” (Hanagod 33:14).