Feb 20 – Drakiyadan!

“Orde aninji papwr usal darakkuda lingan tabme drakiyadan addakueji. Delenden usal darakkudan patatte, do drakiyadan l’ate, bar usal darakkudan janang mutsate. Bindo rong drakiyadan tabme usal darakkuda lingan dakkuteji do bagunji anrukkun l’ute” (Mattiu 9:17).

Angante Kristun mandran amandrengna lingan iytai-gane, anin tabme ganadilan dele. Kuddub papwran ate s’idle do kuddub tabme dele. Anin tabme mandrengna gadile, tabme ranadun, tabme asuyeman, tabme gardinji janggardadage amandrengna-lingan asayamben dete. kuddub tabme, anin aboi tabme-mar ambrij abhanaben dete.

Ateng kan ambrij amandranji daku papwr tandrolanji adtabmeteji. Kan aboi adilan admadriben atena. Kun ambrij, bogad amben tabme drakiyadan papwr drakiyadan-lingan mailabenden er-bangsa dete, do drakiyadan so’ote.

Angante bo mandra Kristu-lingan yirtai, anin akaridaben dete kuddub a pintunji, papwr taramtaman, papwranji ate umdrengle Kitungan a mandranji ampara maina-lingan dakunaben dete. anin bagu mona dakudongete, bo j’ing ganung-lingan, do bo j’ing labo-lingan. anin bagu bungsang-lingan yirle adraptie. Tana’aran do lanumudan amaina agasa. Kun ambrij, enegoi maina agasa ranoitadan do er roitadan, orde Kristun do sonuman.

Tabme darakiyadan aboi Kristun amihaman absuite. Abaran asusuna-lingan, Anin d’an saring drakiyadan gabdile. Do ordaran abara atanakud-lingan, Anin pangle bo pinsa drakiyadan gamle, “Kan a pinsa lingan tabme anosaijan miham-Hen na.” drakiyadan gadlamte Kristun a mihaman uggaranji agijdate ate. Aten asan, tabme drakiyadan a darakkun bo tabme mandran gadlamte, anindaman janang abhananaben dete.

Jisun dile mandranji amandrengna abandate a tabme drakiyadan, engale Anin d’an saring drakiyadan gabdile, Ayingan ate aparamantan arubmang baran dakule. Anin na mandran a d’ong bo Kitungdage amandrengna abmete. Bogad amben Kristu batte amaina a dakulenanden, dile dinnan mandrengnaben langa do ragal dakute.

Tanahimdam Kitungan a onagji, bo tangor amben Kitungan Jisun Kristun abanangsa amaimailenden, amben agaja adayergudne kan ordaran aganijmadba. Angante d’ongben bo bangsa drakiyadan abm’eten, ambendaman papwr pintunji ambrij abhanadongne.

Okiy Kinolbe absele: “Ette na gamle Anin reng jumlen a tiki pinsaman janang hangle gameten, Kan ganagan miham-ling-Hen rong anosaijan na. Dajing tara amben a gate, dijte tara d’ong-Hen ayimben asan kanate lumba” (1 Korintia 11:25).