ಅಕ್ಟೋಬರ್ 28 – ಚೀಯೋನ್ ಪರ್ವತದ ಮೇಲೆ!

“ಆಮೇಲೆ ನಾನು ನೋಡಲಾಗಿ, ಯಜ್ಞದ ಕುರಿಯಾದಾತನು ಚೀಯೋನ್ಪರ್ವತದ ಮೇಲೆ ನಿಂತಿರುವದನ್ನು ಕಂಡೆನು. ಆತನ ಜೊತೆಯಲ್ಲಿ ಒಂದು ಲಕ್ಷ ನಾಲ್ವತ್ತು ನಾಲ್ಕು ಸಾವಿರ ಮಂದಿ ಇದ್ದರು; ಅವರವರ ಹಣೆಯ ಮೇಲೆ ಆತನ ಹೆಸರೂ ಆತನ ತಂದೆಯ ಹೆಸರೂ ಬರೆಯಲ್ಪಟ್ಟಿದ್ದವು” (ಪ್ರಕ ೧೪:೧)

ವಿದ್ಯಾರ್ಥಿಗಳು ತಮ್ಮ ಕಾಲೇಜು ಶಿಕ್ಷಣವನ್ನು ಪೂರೈಸಿದಾಗ, ಕಡೆ ದಿನದಂದು ಕಾಲೇಜಿನ ಪ್ರಾಂಶುಪಾಲರೊಂದಿಗೆ ಒಂದಾಗಿ ನಿಂತು ನೆನಪಿನ ಛಾಯಾಚಿತ್ರವನ್ನು ತೆಗೆದುಕೊಳ್ಳುತ್ತಾರೆ. ಪ್ರಾಂಶುಪಾಲರು ಮಧ್ಯದಲ್ಲಿ ಗೌರವದಿಂದ ಕುಳಿತಿರುತ್ತಾರೆ, ಅವರಿಗೆ ಬೋಧಿಸಿದ ಉಪ-ಪ್ರಾಂಶುಪಾಲರು ಮತ್ತು ಪ್ರಾಧ್ಯಾಪಕರು ಹತ್ತಿರದಲ್ಲೇ ಕುಳಿತಿರುತ್ತಾರೆ.

ಅದೇ ರೀತಿಯಲ್ಲಿ, ಚೀಯೋನ್ ಪರ್ವತದ ಮೇಲೆ ನಿಲ್ಲುವವರು ಕುರಿಮರಿಯಾದವನೊಂದಿಗೆ ಒಂದೇ ಐಕ್ಯತೆಯ ಸಮೂಹವಾಗಿ ನಿಲ್ಲುವರು. ಅದು ಎಷ್ಟೋ ಮಹಿಮೆಯುಳ್ಳ ಕೂಟವಾಗಿರುವುದು!

ಈ ಪರಲೋಕದ ಐಕ್ಯತೆಯ ದರ್ಶನವನ್ನು ಪಡೆದ ಅಪೊಸ್ತಲನಾದ ಯೋಹಾನನು, ತಾವು ಕಂಡದ್ದನ್ನು ಮತ್ತು ಕೇಳಿದ್ದನ್ನು ಇತರರೂ ತಮ್ಮ ಐಕ್ಯತೆಯಲ್ಲಿ ಪಾಲುಗಾರರಾಗುವಂತೆ ಪ್ರಕಟಿಸುತ್ತೇವೆ—ಮತ್ತು ತಮ್ಮ ಐಕ್ಯತೆಯು ತಂದೆಯೊಂದಿಗೂ ಆತನ ಮಗನಾದ ಯೇಸು ಕ್ರಿಸ್ತನೊಂದಿಗೂ ಇದೆ ಎಂದು ಬರೆದನು (1 ಯೋಹಾ 1:3).

ಅಪೊಸ್ತಲರ ಆರಂಭದ ದಿನಗಳಲ್ಲಿ, ಮೇಲಣ ಕೋಣೆಯಲ್ಲಿ ಪವಿತ್ರಾತ್ಮನ ಅಭಿಷೇಕಕ್ಕಾಗಿ ಕಾಯುತ್ತಿದ್ದ 120 ಮಂದಿ ಶಿಷ್ಯರ ಮಧ್ಯೆ ಅದ್ಭುತವಾದ ಐಕ್ಯತೆ ಮತ್ತು ಪ್ರೀತಿಯ ಸಹವಾಸವಿತ್ತು (ಅಪೊ ಕೃತ್ಯ 2:1). ಪೇತ್ರನು ಪ್ರಸಂಗಿಸಿದಾಗ ಸುಮಾರು ಮೂರು ಸಾವಿರ ಜನರು ಸಭೆಗೆ ಸೇರಿಸಲ್ಪಟ್ಟಾಗಲೂ ವಿಶ್ವಾಸಿಗಳ ಮಧ್ಯೆ ಪ್ರೀತಿ ಮತ್ತು ಅನ್ಯೋನ್ಯತೆಯ ಸುಂದರ ಆತ್ಮವಿತ್ತು.

ಇಂದು, ಪ್ರಪಂಚದಾದ್ಯಂತ ವಿವಿಧ ಸಂಪ್ರದಾಯಗಳು ಮತ್ತು ಬೋಧನೆಗಳನ್ನು ಹೊಂದಿರುವ ನೂರಾರು ಸಭೆಗಳಿರಬಹುದು. ಆದಾಗ್ಯೂ, ಪರಲೋಕದಲ್ಲಿ ಹೆಸರುಗಳು ಬರೆಯಲ್ಪಟ್ಟಿರುವ ಸಾರ್ವತ್ರಿಕ ಸಭೆಯೊಂದಿಗೆ ನಿಮ್ಮ ಹೃದಯವನ್ನು ಜೋಡಿಸಬೇಕು. ಪರಲೋಕ ರಾಜ್ಯಕ್ಕೆ ಸೇರಿದ ಪರಿಶುದ್ಧರೊಂದಿಗೆ ನೀವು ಆತ್ಮಿಕ ಅನ್ಯೋನ್ಯತೆಯನ್ನು ಹೊಂದಿರಬೇಕು. ಸತ್ಯವೇದವು ಹೀಗೆ ಹೇಳುತ್ತದೆ: “ಎಲ್ಲರ ಸಂಗಡ ಸಮಾಧಾನದಿಂದಿರುವದಕ್ಕೂ ಪರಿಶುದ್ಧತೆಯನ್ನು ಹೊಂದುವದಕ್ಕೂ ಪ್ರಯತ್ನಮಾಡಿರಿ.” (ಇಬ್ರಿ 12:14)

ಯೇಸು ತನ್ನ ಶಿಷ್ಯರ ಐಕ್ಯತೆ ಮತ್ತು ಪ್ರೀತಿಯ ಅನ್ಯೋನ್ಯತೆಗಾಗಿ ತಂದೆಯಲ್ಲಿ ಅತ್ಯಂತ ಕಾಳಜಿಯಿಂದ ಪ್ರಾರ್ಥಿಸಿದನು. ಯೋಹಾನ 17ನೇ ಅಧ್ಯಾಯದಲ್ಲಿ ಈ ಪ್ರಾರ್ಥನೆಯನ್ನು ನಾವು ಓದಬಹುದು. ಆದರೆ ಯೇಸು ಅವರಿಗಾಗಿ ಪ್ರಾರ್ಥಿಸುವುದಕ್ಕಾಗಲಿ ಅಥವಾ ಐಕ್ಯತೆಯ ಬಗ್ಗೆ ಬೋಧಿಸುವುದಕ್ಕಾಗಲಿ ಮಾತ್ರ ಸೀಮಿತವಾಗಲಿಲ್ಲ. ಆತನು ತನ್ನ ಸ್ವಂತ ಜೀವನದ ಮೂಲಕ ಅದನ್ನು ತೋರಿಸಿಕೊಟ್ಟನು. ಆತನು ಶಿಷ್ಯರ ಕಾಲುಗಳನ್ನು ತೊಳೆಯಲು ಪ್ರಾರಂಭಿಸಿದನು.

ಎಷ್ಟೋ ಆಳವಾದ ನಮ್ರತೆ ಮತ್ತು ಪ್ರೀತಿಯ ಸಹವಾಸದ ಚಿತ್ರಣವಿದು! ಯೇಸು ಕರ್ತನೂ ಗುರುವೂ ಆಗಿರುವ ನಾನು ನಿಮ್ಮ ಕಾಲುಗಳನ್ನು ತೊಳೆದಿರಲಾಗಿ ನೀವೂ ಸಹ ಒಬ್ಬರ ಕಾಲನ್ನು ಒಬ್ಬರು ತೊಳೆಯುವ ಹಂಗಿನವರಾಗಿದ್ದೀರಿ (ಯೋಹಾ 13:14). ಇದು ಕ್ರಿಸ್ತನು ನಮಗೆ ತೋರಿಸಿ ಕೊಟ್ಟ ಮಾದರಿಯಾಗಿದೆ.

ಆದ್ದರಿಂದ, ಕ್ರಿಸ್ತ ಯೇಸುವಿನ ಮಾದರಿಯನ್ನು ಅನುಸರಿಸಿ, ಒಬ್ಬರಿಗೊಬ್ಬರು ದೀನತೆಯುಳ್ಳವರಾಗಿರಿ ಮತ್ತು ಇತರರನ್ನು ನಿಮಗಿಂತ ಶ್ರೇಷ್ಠರೆಂದು ಎಣಿಸಿರಿ.

ಈ ಭೂಮಿಯ ಮೇಲೆ ಐಕ್ಯತೆಯಿಂದ ಬಾಳಲು ನಿರಾಕರಿಸುವವರು ಪರಲೋಕದಲ್ಲಿ ಪರಿಪೂರ್ಣ ಐಕ್ಯತೆಯಿಂದ ಜೀವಿಸಲು ಹೇಗೆ ತಾನೇ ನಿರೀಕ್ಷಿಸಲು ಸಾಧ್ಯ? ನಮ್ಮ ಹೃದಯಗಳಲ್ಲಿ ಕಹಿ, ಕೋಪ, ಸೇಡು ಅಥವಾ ಹಗೆತನವನ್ನು ಇಟ್ಟುಕೊಂಡು ನಾವು ದೇವರ ರಾಜ್ಯವನ್ನು ಹೇಗೆ ಪ್ರವೇಶಿಸಲು ಸಾಧ್ಯ?

ಪ್ರಿಯ ದೇವರ ಮಕ್ಕಳೇ, ದೇವರು ನಿಮಗೆ ನೀಡಿರುವ ಈ ಕೃಪೆಯ ದಿನಗಳನ್ನು ಉಪಯೋಗಿಸಿಕೊಳ್ಳಿರಿ. ನಿಮ್ಮ ಹೃದಯದಿಂದ ಕಹಿ, ಕೋಪ, ಅಸೂಯೆ ಮತ್ತು ಹಗೆತನದ ಪ್ರತಿಯೊಂದು ಕುರುಹನ್ನೂ ತೆಗೆದುಹಾಕಿರಿ.

ಒಂದು ದಿನ, ನಾವು ಕುರಿಮರಿಯಾದವನೊಂದಿಗೆ ಚೀಯೋನ್ ಪರ್ವತದ ಮೇಲೆ ನಿಲ್ಲುವೆವು. ಆ ಮಹಿಮೆಯ ಸಮೂಹದ ಭಾಗವಾಗಲು ನಮ್ರತೆ, ಐಕ್ಯತೆ ಮತ್ತು ಪ್ರೀತಿಯ ಸಹವಾಸವು ಅತ್ಯಗತ್ಯ. ಚೀಯೋನ್ ಪರ್ವತದ ಮೇಲೆ ಕುರಿಮರಿಯಾದವನೊಂದಿಗೆ ಒಂದಾಗಿ ನಿಲ್ಲಲು ಕರ್ತನು ನಮ್ಮ ಹೃದಯಗಳನ್ನು ಸಿದ್ಧಪಡಿಸಲಿ!

ಮುಂದಿನ ಅಧ್ಯಾಯನಕ್ಕಾಗಿ ದೇವರ ವಾಕ್ಯ: “ಬನ್ನಿರಿ, ಯೆಹೋವನ ಪರ್ವತಕ್ಕೆ, ಯಾಕೋಬ್ಯರ ದೇವರ ಮಂದಿರಕ್ಕೆ, ಹೋಗೋಣ! ಆತನು ತನ್ನ ಮಾರ್ಗಗಳ ವಿಷಯವಾಗಿ ನಮಗೆ ಬೋಧನೆಮಾಡುವನು. ಏಕಂದರೆ ಚೀಯೋನಿನಿಂದ ಧರ್ಮೋಪದೇಶವೂ ಯೆರೂಸಲೇಮಿನಿಂದ ಯೆಹೋವನ ವಾಕ್ಯವೂ ಹೊರಡುವವು.” (ಯೆಶಾ 2:3)