ಅಕ್ಟೋಬರ್ 27 –ಹೊಸ ಹಾಡು!

“ಅವರು ಸಿಂಹಾಸನದ ಮುಂದೆಯೂ ಆ ನಾಲ್ಕು ಜೀವಿಗಳ ಮತ್ತು ಹಿರಿಯರ ಮುಂದೆಯೂ ಹೊಸ ಹಾಡನ್ನು ಹಾಡಿದರು. ಭೂಲೋಕದೊಳಗಿಂದ ಕೊಂಡುಕೊಳ್ಳಲ್ಪಟ್ಟ ಆ ಲಕ್ಷದ ನಾಲ್ವತ್ತು ನಾಲ್ಕು ಸಾವಿರ ಜನರೇ ಹೊರತು ಬೇರೆ ಯಾರೂ ಆ ಹಾಡನ್ನು ಕಲಿಯಲಾರರು.” (ಪ್ರಕ ೧೪:೩)

ಚೀಯೋನ್ ಪರ್ವತದ ಮೇಲೆ ಕುರಿಮರಿಯಾದವನೊಂದಿಗೆ ನಿಂತಿದ್ದ ಎಲ್ಲರೂ ಮಹಾ ಆನಂದದಿಂದ ಆ ಸುಂದರವಾದ ಹಾಡನ್ನು ಹಾಡಿದರು. ಆ ಹಾಡನ್ನು ಬೇರೆ ಯಾರಿಗೂ ಕಲಿಯಲಾಗಲಿಲ್ಲ. ಅದು ಒಂದು ಅದ್ಭುತವಾದ ಹಾಡಾಗಿತ್ತು—ಜಯಗಳಿಸಿ ಭೂಮಿಯಿಂದ ವಿಮೋಚಿಸಲ್ಪಟ್ಟವರು ಮಾತ್ರವೇ ಹಾಡಬಹುದಾದ ಹಾಡಾಗಿತ್ತು. ತಮ್ಮ ಲೌಕಿಕ ಪ್ರಯಾಣವನ್ನು ಜಯಕರವಾಗಿ ಪೂರೈಸಿದವರು ದೇವರ ಸಾನ್ನಿಧ್ಯದಲ್ಲಿ ಜಯದ ಮತ್ತು ಸ್ತುತಿಯ ಹೊಸ ಹಾಡನ್ನು ಹಾಡುವರು.

ಹಳೆಯ ಒಡಂಬಡಿಕೆಯಲ್ಲಿ, ಇಸ್ರಾಯೇಲ್ಯರು ಕೆಂಪು ಸಮುದ್ರವನ್ನು ದಾಟಿ ದೇವರ ಮಹಾ ಬಿಡುಗಡೆಯನ್ನು ಕಣ್ಣಾರೆ ಕಂಡಾಗ, ಮೋಶೆ, ಮಿರ್ಯಾಮಳು ಮತ್ತು ಇಸ್ರಾಯೇಲ್ ಮಕ್ಕಳು ವಿಜಯದ ಹಾಡನ್ನು ಹಾಡಿದರು: “ಯೆಹೋವನಿಗೆ ಸ್ತ್ರೊತ್ರವನ್ನು ಗಾನ ಮಾಡೋಣ; ಆತನು ಮಹಾಜಯಶಾಲಿಯಾದನು.” (ವಿಮೋ 15:1)

ಆದರೆ ಚೀಯೋನ್ ಪರ್ವತದ ಮೇಲೆ ಕ್ರಿಸ್ತನೊಂದಿಗೆ ನಿಂತು ವಿಮೋಚಿಸಲ್ಪಟ್ಟವರೊಡನೆ ಹಾಡುವುದು ಎಷ್ಟೋ ಹೆಚ್ಚು ಮಹಿಮೆಯುಳ್ಳದ್ದಾಗಿರುವುದು! ಕೆಂಪು ಸಮುದ್ರದ ಬಳಿ ಹಾಡಿದ ಹಾಡು ಮಹಿಮೆಯುಳ್ಳದ್ದಾಗಿತ್ತು, ಆದರೆ ಕ್ರಿಸ್ತನ ಸಾನ್ನಿಧ್ಯದಲ್ಲಿ ವಿಮೋಚಿಸಲ್ಪಟ್ಟವರು ಹಾಡುವ ಹಾಡು ಅಧಿಕ ಪಟ್ಟು ಮಹಿಮೆಯುಳ್ಳದ್ದಾಗಿರುವುದು.

ಹೊಸ ಒಡಂಬಡಿಕೆಯು ಸ್ತುತಿಗೀತೆಗಳಿಂದಲೇ ಪ್ರಾರಂಭವಾಗುತ್ತದೆ. ಕ್ರಿಸ್ತನ ಜನನದ ಸಮಯದಲ್ಲಿ, ಪರಲೋಕದ ಸೇನೆಯ ಸಮೂಹವು ದೇವರನ್ನು ಸ್ತುತಿಸುತ್ತಾ, ಮೇಲನ ಲೋಕದಲ್ಲಿ ದೇವರಿಗೆ ಮಹಿಮೆಯೂ ಭೂಮಿಯಲ್ಲಿ ಮನುಜರಿಗೆ ಸಮಾಧಾನವೂ ಉಂಟಾಗಲಿ ಎಂದು ಸಾರಿತು (ಲೂಕ 2:14).

ಲೂಕನ ಸುವಾರ್ತೆಯು ಅನೇಕ ಸುಂದರವಾದ ಹಾಡುಗಳನ್ನು ಮತ್ತು ಸ್ತುತಿಗಳನ್ನು ದಾಖಲಿಸುತ್ತದೆ—ಎಲಿಜಬೇತಳ ಹಾಡು, ಮರಿಯಳ ಹಾಡು, ಜೆಕರ್ಯನ ಪ್ರವಾದನಾತ್ಮಕ ಸ್ತುತಿ ಮತ್ತು ಅನ್ನಳ ಕೃತಜ್ಞತಾ ಸ್ತುತಿ. ಕ್ರಿಸ್ತನ ಆಗಮನವು ಆರಾಧನೆ ಮತ್ತು ಸ್ತುತಿಯ ಹೊಸ ಪ್ರವಾಹವನ್ನೇ ತಂದಿತು.

ಪೌಲ ಮತ್ತು ಸೀಲರನ್ನು ಕ್ರೂರವಾಗಿ ಹೊಡೆದು ಸೆರೆಮನೆಗೆ ಹಾಕಿದಾಗ, ಅವರು ತಮ್ಮ ಶ್ರಮೆಯು ತಮ್ಮನ್ನು ಮೌನಗೊಳಿಸಲು ಬಿಡಲಿಲ್ಲ. ಮಧ್ಯರಾತ್ರಿಯಲ್ಲಿ ಅವರು ಪ್ರಾರ್ಥಿಸುತ್ತಾ ದೇವರಿಗೆ ಸ್ತುತಿಪದಗಳನ್ನು ಹಾಡಿದರು (ಅಪೊ ಕೃತ್ಯ 16:25). ಶ್ರಮೆಯ ಮಧ್ಯದಲ್ಲಿದ್ದ ಅವರ ಹಾಡು ಸೆರೆಮನೆಯ ಅಸ್ಥಿವಾರಗಳು ಕದಲಿ, ಬಾಗಿಲುಗಳು ತೆರೆಯಲು ಮತ್ತು ಕಾವಲುಗಾರನು ಅವನ ಕುಟುಂಬದವರೊಂದಿಗೆ ರಕ್ಷಣೆ ಹೊಂದಲು ಕಾರಣವಾಯಿತು.

ಆದರೆ ಇಸ್ರಾಯೇಲ್ಯರು ಬಾಬಿಲೋನಿನ ಸೆರೆಗೆ ಒಯ್ಯಲ್ಪಟ್ಟಾಗ, ಅವರ ಪಾಪದಿಂದಾದ ವೇದನೆಯು ಅವರ ಹೃದಯವನ್ನು ಜಜ್ಜಿಹೋದವು. ಅವರು ಬಾಬಿಲೋನಿನ ನದಿಗಳ ಬಳಿ ಕುಳಿತು ಚೀಯೋನ್ ಅನ್ನು ನೆನಪುಮಾಡಿಕೊಂಡು ಅತ್ತರು (ಕೀರ್ತನೆ 137:1). ಅವರನ್ನು ಸೆರೆಹಿಡಿದವರು ಅವರನ್ನು ಅಪಹಾಸ್ಯ ಮಾಡುತ್ತಾ, ಚೀಯೋನಿನ ಹಾಡುಗಳಲ್ಲಿ ಒಂದನ್ನು ಹಾಡಲು ಕೇಳಿದರು. ಆದರೆ ಅವರಿಗೆ ಹಾಡಲಾಗಲಿಲ್ಲ. ಅವರ ಹೃದಯಗಳು: “ಅನ್ಯದೇಶದಲ್ಲಿ ಕರ್ತನ ಹಾಡನ್ನು ಹಾಡುವುದು ಹೇಗೆ?” ಎಂದು ಗಟ್ಟಿಯಾಗಿ ಅತ್ತರು (ಕೀರ್ತನೆ 137:4). ಅವರು ಚೀಯೋನಿನಿಂದ ದೂರವಾಗಿದ್ದರು, ಮತ್ತು ಅವರ ಹೃದಯಗಳು ದುಃಖದಿಂದ ತುಂಬಿದ್ದವು.

ಆದರೆ ನಮಗಾದರೋ ಮಹಿಮೆಯುಳ್ಳ ನಿರೀಕ್ಷೆಯಿದೆ! ನಾವು ಕ್ರಿಸ್ತನಿಂದ ವಿಮೋಚಿಸಲ್ಪಟ್ಟು ಜಯಶಾಲಿ ಪರಿಶುದ್ಧರಾಗಿ ಚೀಯೋನ್ ಪರ್ವತದ ಮೇಲೆ ನಿಲ್ಲುವಾಗ, ನಮ್ಮ ಹೃದಯಗಳು ಆನಂದದಿಂದ ಉಕ್ಕಿ ಹರಿಯುವವು. ಜೀವಂತ ಬುಗ್ಗೆಯಿಂದ ನೀರು ಹರಿಯುವಂತೆ ಹೊಸ ಹಾಡುಗಳು ನಮ್ಮೊಳಗಿನಿಂದ ನಿರಂತರವಾಗಿ ಹೊರಹೊಮ್ಮುವವು.

ದೇವರ ವಾಕ್ಯವು ಹೀಗೆ ಹೇಳುತ್ತದೆ: “ನಿಮ್ಮಲ್ಲಿ ಸಂತೋಷಪಡುವವನಿದ್ದಾನೋ? ಅವನು ಕೀರ್ತನೆ ಹಾಡಲಿ.” (ಯಾಕೋಬ 5:13) ಚೀಯೋನ್ ಪರ್ವತವು ಮಹಾ ಆನಂದದ ಸ್ಥಳವಾಗಿದೆ. ಕೀರ್ತನೆಗಾರನು ಚೀಯೋನ್ ಅನ್ನು “ರಾಜಾಧಿರಾಜನ ಪಟ್ಟಣವಿರುವ ಚೀಯೋನ್‌ಪರ್ವತ” ಎಂದು ವರ್ಣಿಸುತ್ತಾನೆ (ಕೀರ್ತನೆ 48:2).

ವಿಮೋಚಿಸಲ್ಪಟ್ಟವರೊಂದಿಗೆ ನಾವು ಯುಗಯುಗಕ್ಕೂ ಕರ್ತನನ್ನು ಆರಾಧಿಸುವ ಆ ಮಹಿಮೆಯ ದಿನವನ್ನು ಎದುರುನೋಡುತ್ತಿರುವಾಗ, ಚೀಯೋನಿನ ಆನಂದವು ಇಂದೇ ನಮ್ಮ ಹೃದಯಗಳನ್ನು ತುಂಬಲಿ!

ಮುಂದಿನ ಅಧ್ಯಾಯನಕ್ಕಾಗಿ ದೇವರ ವಾಕ್ಯ: “ಚೀಯೋನ್‌ಪಟ್ಟಣದವರು ಹರ್ಷಿಸಲಿ; ನೀನು ನ್ಯಾಯವನ್ನು ನಿರ್ಣಯಿಸಿದ್ದರಿಂದ ಯೆಹೂದ ಸೀಮೆಯ ನಿವಾಸಿಗಳು ಆನಂದ ಪಡಲಿ.” (ಕೀರ್ತನೆ 48:11)