ಸೆಪ್ಟೆಂಬರ್ 05 – ಮಂದೆಯ ಹೆಜ್ಜೆಯ ಜಾಡು!

“ನಾರೀಮಣಿಯೇ, ನಿನಗೆ ಗೊತ್ತಿಲ್ಲವಾದರೆ ಹಿಂಡಿನ ಹೆಜ್ಜೆಯ ಜಾಡನ್ನು ಹಿಡಿದು ಹೋಗಿ ಕುರುಬರ ಗುಡಾರಗಳ ಬಳಿಯಲ್ಲಿ ನಿನ್ನ ಮೇಕೆಮರಿಗಳನ್ನು ಮೇಯಿಸು.” (ಪರಮ ಗೀತ 1:8)

ಮಂದೆಯಲ್ಲಿರುವ ಕುರಿಗಳು ತಮ್ಮ ಕುರುಬನ ಹೆಜ್ಜೆಗುರುತುಗಳನ್ನು ಹಿಂಬಾಲಿಸುತ್ತವೆ. ಕುರುಬನು ಯಾವಾಗಲೂ ಧೈರ್ಯವಾಗಿ ಮಂದೆಯ ಮುಂದೆ ನಡೆಯುತ್ತಾನೆ. ಕುರಿಗಳು ಕುರುಬನ ಕೈಯಲ್ಲಿರುವ ಕೋಲನ್ನೂ ದೊಣ್ಣೆಯನ್ನೂ ನೋಡಿದಾಗ, ಆತನನ್ನು ಹಿಂಬಾಲಿಸಲು ಧೈರ್ಯಗೊಳ್ಳುತ್ತವೆ.

ಹಳೆಯ ಒಡಂಬಡಿಕೆಯಲ್ಲಿ, ನಾವು ಅನೇಕ ಕುರುಬರ ಹೆಜ್ಜೆಗುರುತುಗಳನ್ನು ನೋಡುತ್ತೇವೆ. ಅಬ್ರಹಾಮ, ಇಸಾಕ, ಯಾಕೋಬ ಮತ್ತು ಮೋಶೆ—ಎಲ್ಲರೂ ಕುರುಬರಾಗಿದ್ದರು. ನಾವು ಅವರ ಹೆಜ್ಜೆಗುರುತುಗಳನ್ನು ಹಿಂಬಾಲಿಸಿದರೆ, ಅಂತಿಮವಾಗಿ ಆ ಹೆಜ್ಜೆಗುರುತುಗಳು ನಮ್ಮನ್ನು ಯೇಸು ಕ್ರಿಸ್ತನ ಬಳಿಗೆ ನಡೆಸುತ್ತವೆ.

ಯೇಸು ಹೀಗೆ ಹೇಳಿದನು: “ನಾನೇ ಆ ಬಾಗಲು. ನನ್ನ ಮುಖಾಂತರವಾಗಿ ಯಾವನಾದರೂ ಒಳಗೆ ಹೋದರೆ ಸುರಕ್ಷಿತವಾಗಿದ್ದು ಹೋಗುವನು, ಹೊರಗೆ ಬರುವನು, ಮೇವನ್ನು ಕಂಡುಕೊಳ್ಳುವನು.” (ಯೋಹಾ 10:9)

ಆತನು ಹೀಗೂ ಹೇಳಿದನು: “ನಾನೇ ಒಳ್ಳೆಯ ಕುರುಬನು. ಒಳ್ಳೆಯ ಕುರುಬನು ಕುರಿಗಳಿಗಾಗಿ ತನ್ನ ಪ್ರಾಣವನ್ನು ಕೊಡುತ್ತಾನೆ.” (ಯೋಹಾ 10:11)

ನಾವು ಹಳೆಯ ಒಡಂಬಡಿಕೆಯಿಂದ ಹೊಸ ಒಡಂಬಡಿಕೆಗೆ ಸಾಗುವಾಗ, ಒಳ್ಳೆಯ ಕುರುಬನನ್ನು ಸಂಧಿಸುತ್ತೇವೆ. ನಾವು ಹಿಂಬಾಲಿಸಬೇಕಾದದ್ದು ಆತನ ಹೆಜ್ಜೆಗುರುತುಗಳನ್ನೇ.

ಈ ಲೋಕದಲ್ಲಿ ಅನೇಕರು ಜ್ಯೋತಿಷಿಗಳನ್ನು, ಮಾಟಗಾರರನ್ನು, ಭವಿಷ್ಯ ಹೇಳುವವರನ್ನು ಮತ್ತು ತಮ್ಮನ್ನು ತಾವೇ ದೇವಮಾನವರೆಂದು ಹೇಳಿಕೊಳ್ಳುವವರನ್ನು ಹಿಂಬಾಲಿಸುತ್ತಾರೆ. ಅಂತಹವರು ತಮ್ಮನ್ನು ಹಿಂಬಾಲಿಸುವವರನ್ನು ನಾಶನದತ್ತ ಕೊಂಡೊಯ್ಯುತ್ತಾರೆ. ಅವರು ಕುರುಡರಿಗೆ ದಾರಿ ತೋರಿಸುವ ಕುರುಡರು.

ಈ ಲೋಕದಲ್ಲಿ ಹಿಂಬಾಲಿಸಲು ಯೋಗ್ಯವಾದ ಮಾದರಿ ಜೀವನವನ್ನು ನಡೆಸಿದ ಏಕೈಕ ವ್ಯಕ್ತಿ ಯೇಸು ಕ್ರಿಸ್ತನು. ನಾವು ಸುರಕ್ಷಿತವಾಗಿ ಹಿಂಬಾಲಿಸಬಹುದಾದ ಏಕೈಕ ಪವಿತ್ರ ಜೀವನ ಆತನದ್ದಾಗಿದೆ. ಆತನು ಒಳ್ಳೆಯ ಕುರುಬನಾಗಿ ನಮಗಿಂತ ಮುಂಚಿತವಾಗಿ ಸಾಗುತ್ತಾನೆ. ಸತ್ಯವೇದವು ಹೀಗೆ ಹೇಳುತ್ತದೆ: “ಒಡೆಯುವವನು ಅವರ ಮುಂದೆ ಹೊರಟಿದ್ದಾನೆ; ಅವರೂ ಬಾಗಿಲನ್ನು ಒಡೆದು ನುಗ್ಗಿ ಹೊರಟಿದ್ದಾರೆ; ಅವರ ಅರಸನು ಅವರ ಮುಂದೆ ತೆರಳಿದ್ದಾನೆ, ಯೆಹೋವನು ಅವರ ಮುಂಭಾಗದಲ್ಲಿ ನಡೆಯುತ್ತಿದ್ದಾನೆ.” (ಮೀಕ 2:13)

ಕುರುಬನು ಕುರಿಗಳ ಮುಂದೆ ನಡೆದು, ಕುರಿಗಳು ಸುರಕ್ಷಿತವಾಗಿ ಹಿಂಬಾಲಿಸಬಹುದಾದ ಹೆಜ್ಜೆಗುರುತುಗಳನ್ನು ಬಿಟ್ಟುಹೋಗಬೇಕು. ಹೌದು, ಕಾಯಿಲೆಯಲ್ಲಿದ್ದವರನ್ನು ಸ್ವಸ್ಥಪಡಿಸಲು ನಮಗಿಂತ ಮುಂಚಿತವಾಗಿ ನಡೆದವನು ಯೇಸು. ಅಶುದ್ಧ ಆತ್ಮಗಳನ್ನು ಓಡಿಸುವುದರಲ್ಲಿ ನಮಗಿಂತ ಮುಂಚಿತವಾಗಿ ನಡೆದವನು ಯೇಸು. ಉನ್ನತವಾದ ಅದ್ಭುತಗಳನ್ನು ಮಾಡುವುದರಲ್ಲಿ ನಮಗಿಂತ ಮುಂಚಿತವಾಗಿ ನಡೆದವನು ಯೇಸು. ಯುದ್ಧಕ್ಕೆ ಸಾಗುವ ಶೂರನಂತೆ ಶಿಲುಬೆಯತ್ತ ಧೈರ್ಯವಾಗಿ ಮುನ್ನಡೆದವನು ಯೇಸು. ಕುರಿಗಳಿಗಾಗಿ ತನ್ನ ಪ್ರಾಣವನ್ನೇ ಕೊಟ್ಟವನು ಆತನೇ. ಆತನನ್ನು ಹಿಂಬಾಲಿಸಿರಿ.

ಹಳೆಯ ಒಡಂಬಡಿಕೆಯಲ್ಲಿ, ತನ್ನ ಅತ್ತೆಯಾದ ನೊವೊಮಿಯನ್ನು ಆಸಕ್ತಿಯಿಂದ ಹಿಂಬಾಲಿಸಿದ ಸೊಸೆಯಾದ ರೂತಳ ಕುರಿತು ಓದುತ್ತೇವೆ. ನೊವೊಮಿಯು ಸೇವಿಸುತ್ತಿದ್ದ ಕರ್ತನೇ ಜೀವವುಳ್ಳ ದೇವರೆಂದು ಅವಳು ತಿಳಿದಿದ್ದಳು. ಆದ್ದರಿಂದ ಅವಳು ದೃಢವಾಗಿ: “ನೀನು ಎಲ್ಲಿಗೆ ಹೋದರೂ ನಾನೂ ಅಲ್ಲಿಗೆ ಬರುವೆನು; ನೀನು ವಾಸಿಸುವಲ್ಲೇ ನಾನೂ ವಾಸಿಸುವೆನು; ನಿನ್ನ ಜನರೇ ನನ್ನ ದೇವರು ಎಂದು ಸಾರಿದಳು. (ರೂತಳು 1:16)

ಪ್ರಿಯ ದೇವರ ಮಕ್ಕಳೇ, ಕರ್ತನನ್ನು ಮಾತ್ರ ಹಿಂಬಾಲಿಸಿರಿ. ನಿಮ್ಮ ಹೆಜ್ಜೆಗಳು ಆತನ ಮಾರ್ಗಗಳಲ್ಲಿ ಸ್ಥಿರವಾಗಲಿ, ಮತ್ತು ನಿಮ್ಮ ಜೀವನವು ಇತರರು ಸುರಕ್ಷಿತವಾಗಿ ಹಿಂಬಾಲಿಸಬಹುದಾದ ದಾರಿಯಾಗಲಿ.

ಮುಂದಿನ ಅಧ್ಯಾಯನಕ್ಕಾಗಿ ದೇವರ ವಾಕ್ಯ : “ಸದ್ಧರ್ಮನಿರತರಾದ ಯೆಹೋವನ ಭಕ್ತರೇ, ನನ್ನ ಮಾತನ್ನು ಕೇಳಿರಿ, ನೀವು ಯಾವ ಬಂಡೆಯೊಳಗಿಂದ ಒಡೆದು ತೆಗೆಯಲ್ಪಟ್ಟಿರಿ, ಯಾವ ಗುಂಡಿಯಿಂದ ತೋಡಲ್ಪಟ್ಟಿರಿ ಎಂಬದನ್ನು ನೋಡಿರಿ.” (ಯೆಶಾ 51:1)