ಆಗಸ್ಟ್ 20 – ಬಲವನ್ನು ಧರಿಸಿಕೊಳ್ಳಿರಿ!

“ಚೀಯೋನೇ, ಎಚ್ಚರಗೊಳ್ಳು, ಎಚ್ಚರಗೊಳ್ಳು, ನಿನ್ನ ಪ್ರತಾಪವನ್ನು ಧರಿಸಿಕೋ! ಯೆರೂಸಲೇಮೇ, ಪರಿಶುದ್ಧ ಪಟ್ಟಣವೇ, ನಿನ್ನ ಚಂದದ ಉಡುಪನ್ನು ಹಾಕಿಕೋ!” (ಯೆಶಾ 52:1)

ಒಬ್ಬ ತಂದೆಯು ಮಲಗಿರುವ ತನ್ನ ಮಕ್ಕಳನ್ನು ಎಬ್ಬಿಸುತ್ತಾನೆ ಏಕೆಂದರೆ ಅವರು ಶಾಲೆಗೆ ತಯಾರಾಗುವ ಸಮಯ ಬಂದಿದೆ. ಅವನು ಅವರನ್ನು ಎದ್ದು, ತಯಾರಾಗಿ, ದಿನವನ್ನು ಪ್ರಾರಂಭಿಸಲು ಉತ್ತೇಜಿಸುತ್ತಾನೆ. ಆದರೆ ನಮ್ಮ ಪರಲೋಕದ ತಂದೆಯು, “ಎಚ್ಚರವಾಗು, ಎಚ್ಚರವಾಗು, ಚೀಯೋನೇ” ಎಂದು ಕರೆದಾಗ, ಆತನು ನಮ್ಮನ್ನು ಸಾಮಾನ್ಯ ಕೆಲಸಗಳಿಗಾಗಿ ಎಬ್ಬಿಸುತ್ತಿಲ್ಲ. ತನ್ನ ಬಲವನ್ನು ಧರಿಸಿಕೊಳ್ಳಲು ಆತನು ನಮ್ಮನ್ನು ಕರೆಯುತ್ತಿದ್ದಾನೆ.

ಒಬ್ಬ ಪೊಲೀಸ್ ಅಧಿಕಾರಿಯು ತನ್ನ ಸಮವಸ್ತ್ರವನ್ನು ಧರಿಸಿದಾಗ, ಅವನು ತನ್ನ ಕರ್ತವ್ಯಗಳನ್ನು ನಿಭಾಯಿಸಲು ಸಿದ್ಧನಿದ್ದಾನೆ ಎಂದು ಅದು ಸೂಚಿಸುತ್ತದೆ. ಅವನ ಸಮವಸ್ತ್ರವು ಸರ್ಕಾರವು ಅವನಿಗೆ ವಹಿಸಿಕೊಟ್ಟಿರುವ ಅಧಿಕಾರವನ್ನು ಸ್ಪಷ್ಟವಾಗಿ ಪ್ರತಿನಿಧಿಸುತ್ತದೆ. ಅವನು ತನ್ನ ಅಧಿಕೃತ ವಾಹನದಲ್ಲಿ ಗಸ್ತು ತಿರುಗುವಾಗ, ಅಪರಾಧಿಗಳು ಮತ್ತು ಕಾನೂನನ್ನು ಮೀರುವವರು ಅದನ್ನು ಗಮನಿಸಿ ಭಯಪಡುತ್ತಾರೆ. ಅದೇ ರೀತಿಯಲ್ಲಿ, ದೇವರ ಮಕ್ಕಳು ಆತನು ತಮಗೆ ಕೊಟ್ಟಿರುವ ದೈವಿಕ ಶಕ್ತಿಯನ್ನು ಧರಿಸಿಕೊಂಡು ಆತನ ಸೇವೆಗೆ ಹೊರಟಾಗ, ಕತ್ತಲೆಯ ರಾಜ್ಯ ಮತ್ತು ಸೈತಾನನ ಎಲ್ಲಾ ಶಕ್ತಿಗಳು ನಡುಗುತ್ತವೆ.

ನಿಮ್ಮಲ್ಲಿ ವಾಸಿಸುವ ಶಕ್ತಿಯನ್ನು ಕಂಡು ಸೈತಾನನೇ ಹೆದರುತ್ತಾನೆ. ಕರ್ತನ ಬೆಂಕಿಯು ನಿಮ್ಮ ಹೃದಯದಲ್ಲಿ ಉರಿಯುತ್ತಿದ್ದರೆ, ಆ ಪವಿತ್ರ ಬೆಂಕಿಯ ಅಭಿಷೇಕದ ಮುಂದೆ ನಿಲ್ಲಲು ಅವನಿಂದ ಸಾಧ್ಯವಿಲ್ಲ. ಆದ್ದರಿಂದ, ಧೈರ್ಯದಿಂದ ಎದ್ದೇಳಿ ಮತ್ತು ದೇವರು ಒದಗಿಸಿರುವ ಬಲವನ್ನು ಧರಿಸಿಕೊಳ್ಳಿರಿ.

ಯೆಶಾಯನ ಪುಸ್ತಕದಲ್ಲಿ, “ಎಚ್ಚರವಾಗು, ಎಚ್ಚರವಾಗು” ಎಂಬ ಪದಗಳು ಮೂರು ಬಾರಿ ಬರುತ್ತವೆ. ಪ್ರತಿ ಬಾರಿಯೂ ಅವು ದೈವಿಕ ಕರೆಯಾಗಿದ್ದು, ಹೊಸ ಹುರುಪಿನಿಂದ ಎದ್ದೇಳಲು ದೇವರ ಜನರನ್ನು ಪ್ರೇರೇಪಿಸುತ್ತವೆ. ನಾವು ಓದುತ್ತೇವೆ: “ಎಚ್ಚರವಾಗು, ಎಚ್ಚರವಾಗು, ಕರ್ತನ ಭುಜವೇ, ಬಲವನ್ನು ಧರಿಸಿಕೊ!” (ಯೆಶಾ 51:9) ಕರ್ತನ ಭುಜಬಲವು ರಾಹಬಳನ್ನು ಪುಡಿಪುಡಿಮಾಡಿತು ಮತ್ತು ಹಿಂದಿನ ಸರ್ಪವನ್ನು ತಿವಿಯಿತು.

ಹತ್ತು ಉಪದ್ರವಗಳ ಮೂಲಕ ಕರ್ತನು ಐಗುಪ್ತ ಮತ್ತು ಫರೋಹನಿಗೆ ತೀರ್ಪು ನೀಡಿದಾಗ, ತನ್ನೊಂದಿಗೆ ನಿಲ್ಲಲು ಆತನು ಮೋಶೆಯನ್ನು ಎಬ್ಬಿಸಿದನು. ಮೋಶೆಯ ಕೈಯಲ್ಲಿ ಕೋಲನ್ನು ಕೊಡುತ್ತಾ ದೇವರು, “ನನ್ನ ಅಧಿಕಾರವನ್ನು ಹಿಡಿದುಕೊ” ಎಂದು ತಿಳಿಸಿದನು. ಆ ಕೋಲನ್ನು ಹಿಡಿದು, ಮೋಶೆಯು ಇಸ್ರಾಯೇಲ್ಯರನ್ನು ಐಗುಪ್ತದಿಂದ ಮಹಿಮಾಭರಿತ ವಿಜಯದೊಂದಿಗೆ ಮುನ್ನಡೆಸಿದನು. ಅದೇ ರೀತಿ, ಆತನಿಗಾಗಿ ದೊಡ್ಡ ಮತ್ತು ಪರಾಕ್ರಮದ ಕಾರ್ಯಗಳನ್ನು ಸಾಧಿಸುವಂತೆ ನೀವು ಕರ್ತನ ಶಕ್ತಿಯನ್ನು ಧರಿಸಿಕೊಳ್ಳಿರಿ.

ನೀವು ಎದ್ದು ಪ್ರಕಾಶಿಸಲು ಕರೆಯಲ್ಪಟ್ಟಿದ್ದೀರಿ. ಕರ್ತನ ಬೆಳಕು ನಿಮ್ಮ ಮೇಲೆ ಮೂಡಿದೆ. ನಿಮ್ಮ ಜೀವನವು ಪಾತ್ರೆಯ ಕೆಳಗೆ ಮರೆಯಾಗಿರಬಾರದು; ಅದು ಬೆಟ್ಟದ ಮೇಲಿರುವ ಪಟ್ಟಣದಂತಿರಬೇಕು. ನೀವು ಲೋಕಕ್ಕೆ ಬೆಳಕಾಗಿದ್ದೀರಿ. ಆದ್ದರಿಂದ, ಪ್ರಕಾಶಿಸಲು ನಿಮ್ಮನ್ನು ಶಕ್ತಗೊಳಿಸುವ ಬಲವನ್ನು ನೀವು ಧರಿಸಿಕೊಂಡಿರಬೇಕು.

ಪ್ರಿಯ ದೇವರ ಮಕ್ಕಳೇ, ಈ ಬಲವನ್ನು ಧರಿಸಿಕೊಳ್ಳುವುದು ನಿಮ್ಮ ಜವಾಬ್ದಾರಿಯಾಗಿದೆ. ಪ್ರಾರ್ಥನೆಯಲ್ಲಿ, ಕೃತಜ್ಞತೆಯಲ್ಲಿ, ಉಪವಾಸದಲ್ಲಿ ಮತ್ತು ದೇವರ ಜನರ ಸಹವಾಸದಲ್ಲಿ ಶಕ್ತಿಯಿದೆ. ಎಲ್ಲಕ್ಕಿಂತ ಹೆಚ್ಚಾಗಿ, ಪವಿತ್ರಾತ್ಮನ ಅಭಿಷೇಕದಲ್ಲಿ ಅಪರಿಮಿತವಾದ ಶಕ್ತಿಯಿದೆ. ಉತ್ಸಾಹದಿಂದ ಮುಂದೆ ಬನ್ನಿರಿ ಮತ್ತು ಆ ಮಹಿಮಾಭರಿತ ಶಕ್ತಿಯನ್ನು ಧರಿಸಿಕೊಳ್ಳಿರಿ.

ಮುಂದಿನ ಅಧ್ಯಾಯನಕ್ಕಾಗಿ ದೇವರ ವಾಕ್ಯ: “ಆದರೆ ನಾನು ನಿನ್ನಲ್ಲಿ ನನ್ನ ಶಕ್ತಿಯನ್ನು ತೋರಿಸಿ ನನ್ನ ಹೆಸರನ್ನು ಲೋಕದಲ್ಲೆಲ್ಲಾ ಪ್ರಸಿದ್ಧಿಪಡಿಸಬೇಕೆಂಬ ಉದ್ದೇಶದಿಂದಲೇ ನಿನ್ನನ್ನು ಸಾಯಿಸದೆ ಉಳಿಸಿದೆನು.” (ವಿಮೋ 9:16)