July 05 – Janggarda Lingan Garbernaba!

“Kuddub garberan do ganarmadan batte dile ayaman Janggarda lingan garbernaba. Bar kuni abmele kuddub badloyim maranji apsele eramuij uyaloge adarmad dakuan dakule garbernaba” (Episi 6:18).

Angante amben a kinolte barij bibolan, butente Kitungan amang dakutenji amang-linganji anabsittan anappaihan dete. iten agaramgaman anabsittan Jakub do Esun amang-linganji. Jakub argalan batte saile Kitungan amangba. Anin apardionan abmele do a U’an anaabsittan ahangben.

Bindo Eson adsaijad iteja, Sanenken Daudo gaamle: “E Kitung, pargardaban karran argalan asan alod’an saijten ambrij, ma Aman abmele pwrarda-hen karran argaldate. Kitungan, Am’eng Kitungan apsele, pwrarda-hen argaldate; angan hen yerre Kitungan amangban ardutai?”. Atanukud bibolan akambo’l-lingan atanakud a tanuban.

Kan ataanimyiman batte ganudingan delai janggardan batte. Ajardinna, Papwr Anosaij-lingan abadlohim-maranji, Tabme Anosaij abadlohim-maranji, unji anganabdile janabanji, bokurdi-unji amayang-maranji do ateng Kitungan a pissirdianji bo surda janajan batte jataji. Aninji gudinglangtenji Kitungan U’an anabsittan batte, erahidan aman’oih ahangben asan. Yang a bangsa kan ate bibolaan agudinglangtenan ate.

Yan a bangsa kan ambrij aparamantan akamb’ol do anabpungge akamb’olan! Aparamangta-lingan, anlen kinoltabe. Adam do Oban abmele Edon kutta-lingan abasulenji ate, do tette pandradan janang danakun dele aganleji adnang. Kan galamtabe aninji abs’idleji Kitungan atanurdun, do Kitungan aganugu. Bo surda danukkan mandran amang-ling susunan dele.

Do banaiberan anappaih gijtabe ‘bayale yirra’ kun ate takudle do maan’oihan batte aganudingan ‘yirai’, Gamle atanakudan ayam bibol-lingan. Bindo iten daku kan ambrij yaryarmanengban? Kitungle Jisu Kristun ordarban labsolai, Kitungan atanurdun abmainaben asan, itente maandran abs’idle. Anin abawrle tanimyiman agaanuding, gamle: “E mannangga do lanagin maaranji, kuddub-ben mangba-Hen yeraiba, do Hen ablulunataben” (Episi 6:18).

Tanahimdam Kitungan a onagji, bogad amben barijloge asailenden j’e-ben batte, argaldaaben Kitungan barijloge tiytaben, absittale abdainataben. Argalan batte butente Kitungan a d’ong saiteji aninji a d’ong ganudingan dete. Anin janang szbdai-berle d’onglen akaridae gamle butente amangba yirtaji. Angante a d’ongan arakadang-lingan amdaileji.

Okiy Kinolbe absele: “Bindo Anin kandrzngban ansadamlen garbereten” (Luk 5:16).