Feb 22 – Rutipun!

“Ruangan saring a latsolenaian am’eng rutipun Hen na. Buteja kan a rutipun saring jumlenden, anin tarda ayam m’engte” (Jon 6:51).

Angante Kitungan mandra a d’ong gabdile do edon kutta-lingan dakule, Anin man’oihan batte mandrengna neeban saring a j’on tiyte, a mengnaben asan mandrengna lingan.

Kitungan Adam a d’ong mandrengna j’on tiyle, bar Manna ruangan saring aganaga, israelanji abmele. Do mangle, Anin tiyaiten mandrena rutipun. Angante anlen garberteben Kitungan amangba dile dinna aganaga abmele, Anin tiylangten aurloge barijtardangge abernan ambrij. Anin ranaptin janang tiylangten, ranadu do ranapti pwrarda-lingan.

Amben pedde ateng mandranji saring gijle ayirai, ayengan a mandranji ranaptin do er t’ual dakuji, iten asan gamlenden aninji kan mandrengna rutipu adjumadji. A pwrarda-linganji danukkan batte, ateng kanalkalanji batte. Aninji kan ambrij galuleji atagorlinganji. Aninji mandrengna rutipu adpagedji orde aninji Kitungan ajanzbjzb-beran admamdangadji, orde dirna beran adnob-lingadji.

Kitungan dile tordong amandranji abmele banangsa lumte. A bernanji amben abmele sanilete barij mandrengna ling-ben. Bo Bibol ganalam-maran gameten kan ambrij: ‘yakurdi-tinji mihnum saring, Hen Kitungan a berna kznollai, tiy-j’eling do maimailai. Bindo nami janang, angante Kitungan a jingba gobtai do Bibolan hamtai, Hen aboi hangnas’ige imdamtinai. Hen kinoltai Kitungan abernan, engale mandran kinolte aboi kamb’olan ambrij jaruloge a hangna”.

Bibolan gamte: “Amben anidolberan a sanilte, iten asan gamlenden kun lingan er ahidan a mandrengnan a hanglai, gamle amben a ogandite do kanate Hen abmele sakkin tiyte” (Jon 5:39). Kitungan marid Bibolan tiybente, kuddub kambolan ambrij si-lingben. Bibol-lingan, ateng kambolanji, bitsara, ganalam, danisam, ganabriberan, sanenken do ateng kambolanji kan ambrij daku.

Bibolan gamte: “Bo ajar dinnan bzgarda darakuna lingan a dakutenaian saring bo dinna rondardi-ling-Namji a dakutenaian bangsadam. Duaih maranji a tambusing linganji a basuben saring Kitung-hen a s’ing lingan turtursang maran a deben asan hen awr itsumtai” (Sanenken 84:10). Tanahimdam Kitungan a onagji, Kitungan a berna ganagaben de’ete, agaja a gaga agale ambrij aganaga kanina ate.

Okiy Kinolbe absele: “E anargal maranji, amben d’an adamban yeraiba; bar e lebun agassan a mandra, yerai, aman hia do juma! U u, iyai, er lebun batte do er janattin batte drakiyadan do arduban hia” (Jisaiya 55:1).