ಸೆಪ್ಟೆಂಬರ್ 23 – ದೇವರನ್ನು ಪ್ರೀತಿಸುವ ಹೃದಯ!

“ನೀವು ನಿಮ್ಮ ದೇವರಾದ ಯೆಹೋವನನ್ನು ಪೂರ್ಣಹೃದಯದಿಂದಲೂ ಪೂರ್ಣಪ್ರಾಣದಿಂದಲೂ ಪೂರ್ಣಶಕ್ತಿಯಿಂದಲೂ ಪ್ರೀತಿಸಬೇಕು.” (ಧರ್ಮೋ 6:5)

ದೇವರು ಇಸ್ರಾಯೇಲ್ ಜನರಿಗೆ ಹತ್ತು ಆಜ್ಞೆಗಳನ್ನು ನೀಡಿದ್ದರೂ, ಕರ್ತನನ್ನು ಪ್ರೀತಿಸುವುದನ್ನೇ ಅತ್ಯಂತ ಶ್ರೇಷ್ಠವೂ ಪ್ರಾಮುಖ್ಯವಾದ ಆಜ್ಞೆಯನ್ನಾಗಿ ಮಾಡಿದನು. ನಾವು ಕರ್ತನನ್ನು ಪ್ರೀತಿಸಬೇಕು, ಹಾಗೂ ನಮ್ಮ ನೆರೆಯವರನ್ನೂ ಪ್ರೀತಿಸಬೇಕು. ನಿಜವಾಗಿಯೂ, ಕ್ರೈಸ್ತಧರ್ಮವು ಪ್ರೀತಿಯ ಮಾರ್ಗವಾಗಿದೆ. ಇದು ಕೇವಲ ದೇವರ ಪ್ರೀತಿಯನ್ನು ಅನುಭವಿಸುವ ನಂಬಿಕೆಯಷ್ಟೇ ಅಲ್ಲ; ದೇವರಿಗೂ ಇತರರಿಗೂ ಆ ಪ್ರೀತಿಯನ್ನು ನಿರಂತರವಾಗಿ ವ್ಯಕ್ತಪಡಿಸುವ ಜೀವನವಾಗಿದೆ.

ದೇವರ ಪ್ರೀತಿಯನ್ನು ಪಡೆದುಕೊಳ್ಳುವುದರೊಂದಿಗೆ ಮಾತ್ರವೇ ನಿಲ್ಲಬಿಡಬೇಡಿರಿ. ಆತನನ್ನು ಉಕ್ಕಿ ಹರಿಯುವ ಪ್ರೀತಿಯಿಂದ ಮರಳಿ ಪ್ರೀತಿಸಿರಿ ಮತ್ತು ಆತನನ್ನು ಘನಪಡಿಸಿರಿ. ಆತನನ್ನು ಸಂತೋಷದಿಂದ ಸ್ತುತಿಸಿರಿ ಮತ್ತು ಆತನಲ್ಲಿ ಆನಂದಿಸಿರಿ. ಅಗಾಧವಾದ ಜಲರಾಶಿಯು ಜಲರಾಶಿಯನ್ನು ಕರೆಯುವಂತೆ, ಕರ್ತನ ಹೃದಯವು ನಿಮ್ಮ ಪ್ರೀತಿ ಮತ್ತು ಸಹವಾಸಕ್ಕಾಗಿ ಹಂಬಲಿಸುತ್ತದೆ.

“ಪ್ರೀತಿಯಿಲ್ಲದವನು ದೇವರನ್ನು ಬಲ್ಲವನಲ್ಲ; ಯಾಕಂದರೆ ದೇವರು ಪ್ರೀತಿಸ್ವರೂಪಿಯು.” (1 ಯೋಹಾ 4:8). ಕೆಲವರು ಗ್ರಹಿಕೆಯಿಲ್ಲದೆ, “ಪ್ರೀತಿಯೇ ದೇವರು” ಎಂದು ಹೇಳಬಹುದು. ಆದರೆ ಪ್ರೀತಿಯೇ ಸ್ವತಃ ದೇವರಾಗಲು ಸಾಧ್ಯವಿಲ್ಲ. ಪ್ರೀತಿಯು ದೇವರ ಶ್ರೇಷ್ಠ ಗುಣಲಕ್ಷಣಗಳಲ್ಲಿ ಒಂದಾಗಿದೆ. ಕಲ್ವಾರಿಯ ಪ್ರೀತಿಯು ತ್ಯಾಗಪೂರ್ವಕ ಪ್ರೀತಿಯಾಗಿ ನಿಮ್ಮನ್ನು ಹುಡುಕಿಕೊಂಡು ಬಂದಿತು. ಆ ಪ್ರೀತಿಯ ನಿಮಿತ್ತವೇ, ನಿಮಗೆ ಪಾಪಕ್ಷಮೆ, ಬಿಡುಗಡೆ ಮತ್ತು ಆಶೀರ್ವಾದಗಳನ್ನು ನೀಡುವಂತೆ ಕರ್ತನು ಶಿಲುಬೆಯ ಶ್ರಮೆಯನ್ನು ಮನಃಪೂರ್ವಕವಾಗಿ ಸಹಿಸಿಕೊಂಡನು.

ನಿಮಗಾಗಿ ತನ್ನನ್ನೇ ಒಪ್ಪಿಸಿಕೊಟ್ಟು, ನಿಮಗೋಸ್ಕರ ತನ್ನ ರಕ್ತದ ಕೊನೆಯ ಹನಿಯನ್ನೂ ಸುರಿಸಿದವನನ್ನು ಪ್ರೀತಿಸದೆ ಇರಲು ನಿಮಗೆ ಹೇಗೆ ಸಾಧ್ಯ?

ಯಾವ ಕ್ರೈಸ್ತನಲ್ಲಿ ದೇವರ ಪ್ರೀತಿಯು ಇರುವುದಿಲ್ಲವೋ, ಅವನು ಕ್ರಿಸ್ತನ ಸ್ವಭಾವವನ್ನು ನಿಜವಾಗಿಯೂ ಪ್ರತಿಬಿಂಬಿಸಲು ಸಾಧ್ಯವಿಲ್ಲ. ಅದಕ್ಕಾಗಿಯೇ ಅಪೊಸ್ತಲನಾದ ಪೌಲನು ಪ್ರೀತಿಯ ವಿಷಯಕ್ಕಾಗಿ ಒಂದು ಇಡೀ ಅಧ್ಯಾಯವನ್ನೇ ಮುಡಿಪಾಗಿಟ್ಟಿದ್ದಾನೆ—1 ಕೊರಿಂಥದವರಿಗೆ 13.

“ನಾನು ಮನುಷ್ಯರ ಭಾಷೆಗಳನ್ನೂ ದೇವದೂತರ ಭಾಷೆಗಳನ್ನೂ ಆಡುವವನಾದರೂ ಪ್ರೀತಿಯಿಲ್ಲದವನಾಗಿದ್ದರೆ ನಾದಕೊಡುವ ಕಂಚೂ ಗಣಗಣಿಸುವ ತಾಳವೂ ಆಗಿದ್ದೇನೆ.” (1 ಕೊರಿಂಥ 13:1)

ಕರ್ತನು ಕೆಲವರಿಗೆ ಆತ್ಮಿಕ ವರಗಳನ್ನು ಮತ್ತು ಮಹತ್ತರವಾದ ಆತ್ಮಿಕ ಶಕ್ತಿಯನ್ನು ನೀಡಬಹುದು, ಹಾಗೂ ಅವರ ಮೂಲಕ ಮಹತ್ಕಾರ್ಯಗಳನ್ನು ನಡೆಸಬಹುದು. ಆದಾಗ್ಯೂ, ಅವರು ಅಹಂಕಾರಪಟ್ಟು ತಮ್ಮನ್ನು ತಾವೇ ಹೆಚ್ಚಿಸಿಕೊಂಡಾಗ, ತಮ್ಮ ಮೊದಲ ಪ್ರೀತಿಯಲ್ಲಿ ನೆಲೆನಿಲ್ಲಲು ಸಾಧ್ಯವಾಗದೆ, ಕಡೆಗೆ ಬಿದ್ದುಹೋಗಬಹುದು.

ಕರ್ತನು ನಮ್ಮಿಂದ ನಮ್ಮ ಮೊದಲ ಪ್ರೀತಿಯನ್ನೂ, ನಮ್ಮ ಪೂರ್ಣಹೃದಯದ ಪ್ರೀತಿಯನ್ನೂ ಬಯಸುತ್ತಾನೆ. ಅದಕ್ಕಾಗಿಯೇ ಆತನು ಪೇತ್ರನಿಗೆ ಹೀಗೆ ಕೇಳಿದನು: “ಅವರು ಊಟಮಾಡಿದ ಮೇಲೆ ಯೇಸು ಸೀಮೋನ ಪೇತ್ರನನ್ನು– ‘ಯೋಹಾನನ ಮಗನಾದ ಸೀಮೋನನೇ, ನೀನು ಇವರಿಗಿಂತ ನನ್ನ ಮೇಲೆ ಪ್ರೀತಿ ಇಟ್ಟಿದ್ದಿಯೋ?’ ಎಂದು ಕೇಳಲು ಅವನು – ಹೌದು ಸ್ವಾಮಿ, ನಿನ್ನ ಮೇಲೆ ಮಮತೆ ಇಟ್ಟದ್ದೇನೆಂಬದನ್ನು ನೀನೇ ಬಲ್ಲೆ ಅಂದನು. ಆತನು ಅವನಿಗೆ – “ನನ್ನ ಕುರಿಮರಿಗಳನ್ನು ಮೇಯಿಸು” ಅಂದನು.” (ಯೋಹಾ 21:15)

ಹಾಗಾದರೆ, ಕ್ರಿಸ್ತನನ್ನು ನಮ್ಮ ಹೃದಯದಂತರಾಳದಿಂದ ಪ್ರಾಮಾಣಿಕವಾಗಿ ಪ್ರೀತಿಸದೆ, ಆತನನ್ನು ಪ್ರೀತಿಸುತ್ತೇವೆಂದು ಹೇಳಿಕೊಳ್ಳುವುದು ಹೇಗೆ? ಸ್ವಾರ್ಥದ ಪ್ರೀತಿಯನ್ನು ತೆಗೆದುಹಾಕಿರಿ. ಕಪಟ ಮತ್ತು ಡಾಂಬಿಕ ಪ್ರೀತಿಯನ್ನು ತಿರಸ್ಕರಿಸಿರಿ. ವಂಚನೆ ಅಥವಾ ಕಪಟವಿಲ್ಲದೆ, ನಿಷ್ಕಲಂಕವೂ ಶುದ್ಧವೂ ಆದ ಹೃದಯದಿಂದ ಕರ್ತನನ್ನು ಪ್ರೀತಿಸಲು ನಿರ್ಧರಿಸಿರಿ.

ದೇವರ ವಾಕ್ಯವು ಹೀಗೆ ಘೋಷಿಸುತ್ತದೆ: “ಮತ್ತು ಆತನ ಸಿಂಹಾಸನದ ಮುಂದಿರುವ ಏಳು ಆತ್ಮಗಳಿಂದ ಮತ್ತು ನಂಬತಕ್ಕ ಸಾಕ್ಷಿಯೂ ಸತ್ತವರೊಳಗಿಂದ ಮೊದಲು ಎದ್ದು ಬಂದವನೂ ಭೂರಾಜರ ಒಡೆಯನೂ ಆಗಿರುವ ಯೇಸು ಕ್ರಿಸ್ತನಿಂದ ನಿಮಗೆ ಕೃಪೆಯೂ ಶಾಂತಿಯೂ ಆಗಲಿ. ನಮ್ಮನ್ನು ಪ್ರೀತಿಸುವವನೂ ತನ್ನ ರಕ್ತದ ಮೂಲಕ ನಮ್ಮನ್ನು ಪಾಪಗಳಿಂದ ಬಿಡಿಸಿದವನೂ ನಮ್ಮನ್ನು ರಾಜ್ಯವನ್ನಾಗಿಯೂ ತನ್ನ ತಂದೆಯಾದ ದೇವರಿಗೆ ಯಾಜಕರನ್ನಾಗಿಯೂ ಮಾಡಿದವನೂ ಮಾಡಿದವನೂ ಆಗಿರುವಾತನಿಗೆ ಯುಗಯುಗಾಂತರಗಳಲ್ಲಿಯೂ ಘನ ಮಹತ್ವಗಳಿರಲಿ ಆಮೆನ್.” (ಪ್ರಕ 1:5–6)

ಪ್ರಿಯ ದೇವರ ಮಕ್ಕಳೇ, ಕ್ರಿಸ್ತನ ಪ್ರೀತಿಯು ನಿಮ್ಮ ಹೃದಯವನ್ನು ತುಂಬಲಿ. ಆತನನ್ನು ಕೇವಲ ಮಾತುಗಳಿಂದ ಮಾತ್ರವಲ್ಲದೆ, ನಿಮ್ಮ ಇಡೀ ಜೀವಮಾನದಿಂದ ಪ್ರೀತಿಸಿರಿ. ನಿಮ್ಮ ಪ್ರೀತಿಯು ನಿಮ್ಮ ವಿಧೇಯತೆಯಲ್ಲಿ, ನಿಮ್ಮ ಆರಾಧನೆಯಲ್ಲಿ, ನಿಮ್ಮ ಸಂಬಂಧಗಳಲ್ಲಿ, ನಿಮ್ಮ ತ್ಯಾಗಗಳಲ್ಲಿ ಮತ್ತು ನಿಮ್ಮ ಸೇವೆಯಲ್ಲಿ ಕಂಡುಬರಲಿ.

ಮುಂದಿನ ಅಧ್ಯಾಯನಕ್ಕಾಗಿ ದೇವರ ವಾಕ್ಯ:

“ದೇವರು ಮೊದಲು ನಮ್ಮನ್ನು ಪ್ರೀತಿಸಿದ್ದರಿಂದ ನಾವು ಪ್ರೀತಿಸುತ್ತೇವೆ.” (1 ಯೋಹಾನ 4:19)